Daily Newspaper

EXODUS

17

C.Zâma

Kum 1971 March 25-ah Bengali politician Awami Leaque Party President Sheik Mujhibhur Rahman-a’n E.Pakistan chu Bengali ram a ni tiin Bengali tan independent a puang ta rup mai a. Zofate tana Independent puanga Zoram chhana rammu hnam pasaltha kum 1968 tawp lam atanga Mizoram chhuahsana Sajek tlangdung E.Pakistan-a awmte chuan an tual zawlah hmelma an hmachhawn a tul leh ta a ni.

Zoram chhana rammu Mizo hnam pasalthate tihchimih tum ran, India sawrkar chuan Bengali hovin zalenna an puang chu remchanga lain, a hmelma hlun Pakistan ram bung pakhat E.Pakistan chu sipai chaknaa liberate-a, chumi ruala Mizo pasaltha ramchhana rammute tih chimih nghal tumin beihpui a thlak ta a. India sipai leh Bengali volunteer an tangdun a. Mizo hnam sipai leh Pakistan sipai an tangdun bawk a an inbei ta a ni.

Rangamati (Rangamati hi District Capital a ni) -ah hian Pu Laldenga hovin a hotu bawr an awm a, Pakistan sipai Lt. Col. Jaidi Khan a awm bawk a. Lt. Col. Jaidi Khan leh Col. Lianhnuna leh hnam sipai hotu dang ten hmelma beih dan tur an rel ho thin a ni. Mizo hnam sipai battalion hrang hrang, Department of Public Safety (DPS) Police kan tih ang hi leh Emergency Armed Force (EAF) te chu ralhmatawng (front line)-ah an awm a. (Civil Dept. hrang hranga mite chu ralthuam hmang thei tura training tir an ni a, an training zawh veleh ralhmatawngah tirh nghal an ni a, EAF tia vuah an ni.) Pu Laldenga chu Mizo hnam sipai Platoon khatin an veng a. Chittagong kawtchhuahah hnam sipai Platoon khat an awm bawk a. Heng bakah hian damlo, damkawr damdawi tlan lai leh chhungkua (family) 45 vel an awm bawk a. Thil pawimawh avanga Rangamati tlawh hnam sipai, DPS leh EAF an awm deuh reng bawk a.

Indona chu a sosang zel a, Dec. 16, 1971 chawhnu lamah E.Pakistan-a Pakistan sipai commander General Niaji chu India sipai laka a tlawm tak avangin E.Pakistan-a Pakistan sipai awm zawng zawngte chuan ‘Kan tlawm e’ tia India sipai kuta an inpek a ngai ta a ni. Pu Laldenga’n Pakistan sipai tlawm thu a hriat chuan a Secretary Pu Zoramthanga hruaiin Rangamati-a Pakistan sipai commander Lt. Col. Jaidi Khan a awmnaah an hmu a. Lt. Col. Jaidi Khan chuan, “Chittagong-ah kan chhuk thla dawn a, kan rualin in kal ve duh em, engtinnge in awm dawn?” tiin a zawt a. (Pakistan sipai Chittagong sector-a awmte chu chung lam atanga thupekin Chittagong-a kalkhawm vek tura tih an ni.) Pu Laldenga’n, “Kan kal ve lo vang, kan awmdan tur chu keimahni’n kan rel ang,” a ti a. Lt. Col. Jaidi Khan chuan Pakistan pawisa Rs 70,000/-a pe a, Pu Laldenga te chu an kir leh ta a.

Pakistan a tlawm tak avangin E.Pakistan-a hnam pasaltha rammu awmte chu an in-surrender a nih loh chuan a rang thei ang bera E.Pakistan an chhuahsan a ngai dawn a ni. Pakistan sipaite angin ‘Kan tlawm ta e’ tiin puan var an zar mai dawn nge, Rangamati atangin chhuah an tum dawn? An kal zel dan tur ngaihtuah turin Assembly Speaker Pu Vanhela’n Civil lama officer chin, Party Executive member, Party National Council member, Senator, M.P leh sipai lamah Field Officer chin chu President Pu Laldenga awmnaa kal khawm turin a hriattir nghal a. An boruak tawn chu thih leh dam inkâr a nih avangin kal tura hriattirte chu kar loah an kalkhawm nghal a.

Kal khawm tur chin bithliah ni mah se, engtinnge ro an rel tih hriat tumin bithliah chin bak a hman hman an kal ve a ni ta mai a, an thahnem hle a. Thurel an la tan loh avangin mahni ngaihdan sawiin an ri nuai nuai a. “Kan awmna hi tuipui hual vel a ni a, kal chhuah ngaihna a awm lo. Chittagong lama mite hi la kah kawlh loh an ni a, hrawn an nuam deuh ang, an kutah inpe ila a tha ber ang” ti tawk an awm a. “Khawi lam mah pan a ngai lo, kan awmnaah hian puan var zarin nghak tawp mai ila a tha ber ang” ti tawk an awm bawk a.

Mipui an thuhmun fo thei lo tih hla ang deuhin Pu Laldenga awmnaa kal khawmte hi an dinhmun a inang lo va, thenkhat chhangchhia nupui fanaute nena awm an ni a, thenkhat damkawr chak lo damdawi tlan lai an ni a. |henkhatte erawh chu hrisel tha (fit for) an ni a. Chuvang chuan an ngaihdan pawh a inchen lo hle a, in-surrender duh an awm pawh hi an demawm hran lo a ni.

Rangamati hi tui hual vela awm a ni a, khawthlang lam leh hmar thlang lam tih loh chu Kaptai tuikhuahin a hual vek a.Vaukam hmun tinah India sipai leh Bengali volunteer an awm a. Chittagong lamah lah chuan Rangamati atanga hla vak loah helicopter-in India sipai a thlak zut zut a. Helicopter-in a thlak ni lo, khawmuala kea kal, helicopter-in a thlakte awmna hmun thleng thahnem tak an awm bawk a. Khawchhak lamah han kal dawn se lawng a awm bawk si lo. Lawng awm pawh ni se vaukam hmun tinah hmelma an inzar pharh bawk si. Hmar thlang lamah kal dawn se India sipai a ngapin an ngap a ni si a. Hawina lam apiang a pik chun vek mai a, ‘thu a tawp e lumam’ tih chu an chan ni tain ‘thing zik bula zawng dan’ ang an ni ta.

Mahni ngaihdan sawia an phun mur mur lai chuan Chief Justice Ngurliana’n, “Mangan laia tanpui vartu hnai reng Pathian kan nei a lawm, a hruaina dilin i tawngtai rual phawt mai ang u,” tiin tawngtai rual a rawt a, an tawngtai rual ta a. Manganin a vawrtawp a thleng a ni bawk a, an tawngtai chu a thum hian a thum hum hum mai a. Thum hum hum kârah tap rawl leh mangang au rawl hriat tur a awm bawk a. An han amen a, thil thar hriat an nei lo va, an tawngtai rual leh a, an amen a, thil thar hriat emaw dawn emaw an nei lo va. Vawi thum an tawngtai rual an han amen chuan Pakistan sipai Maj. Kaptai lam atanga lokalin Pu Laldenga a rawn hmu a, Chittagong-a chhuk a tum thu a hrilh rualin, “Khawchhak lama kal in tum chuan Tatkawng lui zawh ula, a kamah Bengali volunteer Platoon khat vel an awm a, in tawn tlang thei mai ang. Hmun dangah chuan India sipai an tam em a, in sutlang zo lo vang,” a ti a. Pawisa tlem a pek bakah speed boat a hnutchhiah a, Chittagong pan turin a chhuahsan lehnghal a.

Pu Laldenga’n chair atangin kal khawmte chu dinga an ngaihdan sawi turin a ti a. Tumah an ding lo va, a reh thuap mai a. Nakin deuhah chuan Col. Biakchhunga a rawn ding a, “Kan dinhmun hi a harsat em avangin dinga ngaihdan sawi kan awm lo va. Keini sipai lam chuan Rangamati atanga a rang thei ang bera chhuah tha kan ti a. Thil hmanhmawh thlak a nih avangin lawng awm zawng zawng hi man khawm ila, zaninah ngei Rangamati hi kan chhuahsan a ngai a ni,” a ti a.

Pu Laldenga’n, “Sawi duh nei kan awm em, han sawi zel teh u,” a ti a, engemaw chen a nghah hnu pawhin tumah an ding lo va. A reh thuap mai a, hriau pawh thlauh ila, a ri bawl thei ang tih tur khawpinin thawm dang a awm lo a ni. Pu Laldenga chu a thutna atanga rawn dingin kal khawmte chu ngun takin a han thlek kual a, a chil a lem khalh khalh a, “Zalenna suala zam lova kan kal zel a tul a ni,” tiin thutlukna a siam ta a. Col. Biakchhunga chu troop commander atan a ruat nghal a.

Col. Biakchhunga’n hnam sipai officer leh NCO thenkhat lawng zawng turin a tir a, Pathianin a hruai tih loh rual a ni lo. Rei lo tê chhungin khualzin phur lawng Launch 6 lai an rawn hmu ta mai a. Lawngte chuan an kal duhna hmun thlen theihna tur diesel an pai vek bawk a. Rangamati leh a chhehvela awmte chu an lam khawm nghal zung zung a. Upain ‘Aimit thlawn’ an tih anga thim hnuaiah zanlai dar 12:00 pelh hnuah Rangamati chu lawngin an chhuahsan ta a ni.

Hmelmain an hmuh an hlauh avangin êng an chhi ngam lo va, lighter talh takngial pawh an phal lo va, Rangamati chhuahsan mahse kawngah engnge an tawh dawn an hre lo. Hmatiang hmuh lawk loh kawng hlauhawm a hnai thei tih hla rilrua sa chungin, a tha ber beisei chung leh a chhe ber pawh thleng se tawk tura inpeihin an kal zel a. Thimtham hnuaia eng chhi lova kal an nih avangin lawng kal hmasa leh a hnuhnunga kal chu a insu thelh a, tuifawn avangin lawng chu a lei ta bur bur mai a, pil mai dawna an hriat avangin an thawmhnaw te chu tuiah an paihthla phawk phawk a, a pil ta em lo va.

Khawvar hnuah Tatkawng lui chhuah (Tatkawng luiin Kaptai tuikhuah a finna) an thleng a, Tatkawng lui chu an zawh ta a. Chhak deuhah Bengali volunteer nen an inkâp a. Engemaw chen an inkah hnuah Bengali volunteer-te chu an tlawm ta a. An kal zel a, lawngin a zawh theih tawp thleng an kal a, chumi hmunah chuan India sipai nen an inkâp leh a. India sipaite chu rei tang ngam lovin an tlanchhia a. An kal zel a, harsatna dang sawi tham tawk lovin Arakan an thleng ta a ni.

Ral hmatawnga awmte pawhin an awmna hmun theuh atangin Pathian ven leh kaihhruaiin Bawm ram an thleng thei a, Bawm ram atanga kal zelin Arakan-ah an inhmukhawm leh ta a ni. ‘Aigupta sala tâng Israel fate Pathianin a hruaichhuak ang khan keini pawh thihna thlazar hnuai atangin Pathianin min hruai chhuak a ni’ tiin E.Pakistan atanga an tlanchhuah chu a hmingah Exodus an vuah a. 1972 atang khan kum tin Dec. 16 hi Pathian hnena lawmthu sawi nan leh ram leh hnam tana inhlan thar nan an hmang thin a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy