Aspirational District Mamit hmasawnna hna kal mek thlirhoin Ningani khan sawrkar laipui Ministry of External Affairs directorM Keivom kaihhruaiin a kaihnawih sawrkar department-te nen an thukhawm.
External Affairs director chuan India sawrkar hnuaia hna a thawhna kawnga a tawnhriat hrang hrang sawiin, Mamit district-a hmasawnna hna a nihna tur ang taka thawk a, Aspirational District an nihna atanga khaichhuah an nih theih nan theihtawp chhuah turin official-te a chah. Aspirational District Programme hnuaia project bawhzuina hrang hrangah a chhawr tangkaitu turte hnen atanga thurawn lak a pawimawh thu leh project siamtute tan tunlai hmasawnna mila training neih that a tul thu a sawi a ni.
Mamit sub deputy commissioner Grace Lalremdiki chuan district hnufual chawikanna atana hmasawnna hna kal mek leh zawh tawh, hmabak la awmte a lem nen a sawifiah a. Sawrkar laipui kaltlanga NITI Aayog atangin sum, vaibelchhe 19 hmuh a ni a; tunah hian vbch.2 lokal mek awmin, hei hi 2023 August-a overall ranking-a pangana an nih avanga award-in a kentel a ni. Mamit district hian tehna hrang hrangah dinhmun duhawm tak tak a hauh tawh a. Pakhatna bakah tehkhawng hnuhnung ber August 2023 khan overall-ah 5-na a ni.
Aspirational District Mamit hnuaia line department hrang hrangten an hna kal meka hlawhtlinna awm leh hmachhawp bakah harsatna an neihte an sawi a ni.
India rama district hnufual chawikan tur, Aspirational District a nihna anga hmasawnna in a thlenna tur department hrang hrangah sawrkar laipui kaltlanga hna kal mekah hian health & nutrition, education, agricultural & water resources, financial inclusion & skill development leh basic infrastructure-ah hma lak a ni a, heng hnaah hian rah duhawm tak tak hmuh chhoh mek a ni.
Central hotu M Keivom hian District Hospital Mamit, Anganwadi Centre-9 leh Mamit College a tlawh nghal a. Vawiin – July 12 hian Darlak leh Bawngva khuaa Health & Wellness Centre leh Anganwadi Centre-te a tlawh ang.
External Affairs director hoin Mamit chawikan mek dan sawi
