Daily Newspaper

F. Vanlalhriatrenga a fam ta

17

‘Hnehna Tumkau’ tih hla a sak avanga Zoram rimawi khawvelin a hmelhriat, zaithiam leh hlaphuah thiam F. Vanlalhriatrenga, kum 39, chu cancer avangin Pathianni kalta, zan dar 7:45 khan Dr. B. Borooah Cancer Institute, Guwahati-ah a thi a, nizan khan a chenna Nursery Veng-a primary school kawtah vui a ni a, Hriatrenga hian a nupui leh a fate pathum a kalsan a ni.

Hriatrenga MZI executive memer ni a, a vuinaah hian MZI-in ‘Hnehna Tumkau’ hla sain an thlah a ni.

Hriatrenga hi 2020 kum bul lam khan taksa chak lohna avangin ICU-ah dah luh a ni a, thla hnih vel an inenkawl hnuah cancer tih hriatchhuah a ni a, enkawl chhunzawm nghal niin, January ni 3, 2021 zan khan chatuan ram a pan ta a ni. January ni 3 zan hian a ruang hi Mizoram panpui nghal a ni a, nimin tlai khan a chenna in thlenpui niin, nizan khan an vui ta nghal a ni.

Hriatrenga hi a naupan lai, 1993 khan AIR (All India Radio)-ah child artist-in a lut a, kum a tlin hnuah audition paltlang lehin AIR artist puitlingah hlankai a ni a, hla pawh eng emaw zat a khung tawh a, zai mai bakah AIR-ah hian musician & humour artist a ni bawk.

Naupan lai atanga thu leh hla lama tui niin article ziah leh hla inphuahsiakah te pawh lawmawm a lo dawng ve nual tawh a, 2005 khan a hlaphuah a dah khawmna audio album tichhuakin, a hla phuahte chu chutih laia zaithiam lar tak tak Zosangliani, Lyni Lalthanzuali, Elizabeth Zodinpuii, Lalngêngpuii, Lalramhluna, H.Lalthakima leh Joseph Zaihmingthanga te pawhin an sa nghe nghe a ni.

Rimawi khawvela Zoramin a hmelhriat tanna chu 2003-a a album ‘Hnehna Tumkau’ tih kha niin, a album title track hi a larpui hle a, hei bakah hian ‘Leilung Mawina’ tih hla AIR-a a thun pawh a hun laia radio-a gospel hla thlan hlawh pawl tak a ni. Zai mai bakah hla pawh a phuah nual a, a hlaphuah zingah chuan B. Malsawmtluangi (SPi) sak ‘Ban zai ka rel mah na’, ‘Ka ngai em che’ tih leh ‘Min phuar si’ tih te, ‘Biahnem hrilh ka nuam’ (H. Lalthakima), ‘Ka ngai ber che’ (Eli), ‘Min hrilh ve ta che’ (Eli), ‘Anka nem chauh’ (Spi, Donny & Lilzo), ‘Ka tar bik lo ve’ (R. Lalramhluna), ‘Tuar thiam a har ngei’ (Sangkimi), ‘An phal lo maw/A na chuang ngei’ (Joseph Zaihmingthanga & H. Lalthakima) leh ‘Ka bahhnukte’ (Josephine) te pawh a larzual an ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy