F1 era thara hnehna chang hmasaber Russel

F1 era thara hnehna chang hmasaber Russel
Pathianni khan Formula One kalphung thara intlansiak hmasaber leh kumin atana world championship race hmasaber ni nghal bawk Australian Open-ah Mercedes driver George Russell chuan hnehna changin, a team-mate Andrea Kimi Antonelli chu pahnihna a ni a, pathumnaah Ferrari khalhtu Charles Leclerc a thleng ve bawk.
Albert Park Grand Prix Circuit, Melbourne-a an driver-in hnehna hlu bik a sual chhuah khan pre-season laia team hmasawn Mercedes ziarang dik tak a rawn pholang tan taa ngaih niin, an tana hlauhawm pha deuh ber tur zinga mi McLaren an talbuai zan a lo ni ve leh chiah kha German team vanneihna a ni tel bawk ang.
Pathianni season-opening Australian Grand Prix tir lama chesual McLaren driver pakhat zawk Oscar Piastri chu tlanchhuak zo lo driver zingah telin, a team-mate leh defending champion ni bawk Lando Norris pawh pangana a ni pha hram!
Qualifying a thunun hnuah pole-sitter Russell chuan a vawi khatna atan Albert Park tlankawngah hnehna a sualchhuak a; Briton hi Mercedes driver dang Antonelli nen second thum tling lo hlekin finishing line-ah an inthlau a, pathumna Ferrari khalhtu Leclerc nen erawh second 15 chuangin an inthlau thung.
Nimin chawhnu lam ni dul ruih hnuaia intlansiakah seven-times world champion Lewis Hamilton of Ferrari chu palinaah thlengin, vawi li champion ve tawh Red Bull chhuanvawr Max Verstappen chu parukna a ni.
Car 22-ah car 20 chiahin bul an tan thei a, intlansiak tan dawna harsatna tawk Audi khalhtu Nico Hulkenberg a inhnukdawk thut a; driver pathum tlanchhuak zo lo zingah Red Bull khalhtu Isack Hadjar a tel bawk.
New F1 era an tih mai intanna Australian Grand Prix-a lawmman semna dawhsana winner’s trophy chawitu George Russell kha kum 2019-a pakhatna Valtteri Bottas hnu lama Mercedes driver zinga Australia leilunga chak leh hmasaber a ni.
A tir lamah Briton Russell hian Leclerc lak atangin chona hmachhawn tur a nei a, a tir lap hmasa 10 chhung khan hma inhruai chhawk zak zak bawk mah se virtual safety car (VSC) laiin Ferrari lamin decision an thlak a, nuamsain Mercedes-in race an thunun zui theih phah ta a ni.
Hnehna a chan hnuah Russell pawhin a tir lama Ferrari driver nena an inbeihna hautak a tihzia thu hahipa sawichhuak chungin race a zawh meuh kha chuan a tanky-ah battery level pawh tih tham a awm tawh loh thu a sawi a, khati khawpa Charles nena bultanna hautak an hmachhawn dun chunga finish line cross thei hmasaber a ni kha nihlawh a intih thu a sawi bawk.
Kum li ngawt F1 tlankawnga harsatna lian tak an tawh hnuah Mercedes chuan Formula One an rawn thunun chho leh tan dawn niin a lang!
Rawlthar kum 18 mi Racing Bulls driver Arvid Lindblad kha Briton zinga F1 race hmachhawn thei hmasaber niin, a debut-ah pariatna a ni pha a; a chipui Oliver Bearman (Haas) hnung chiahah a thleng.
Pakuana chu Audi khalhtu Gabriel Bortoleto (Audi) niin, point hniam ber hmutu Pierre Gasly (Alpine) chu 10-na a ni.
Season thara intlansiak vawi hnihna chu Asia khawmualpui lamin a thleng dawn a, kartawp hian China rama Shanghai International Circuit-ah team an fuankhawm zui leh dawn a; Inrinniah intlansiak tawi zawk sprint race hmasaber an tlan bawk ang.