March 1, Nilai zan khan FA Cup fifth round khelh chhunzawm a ni a, Premier League club lian Tottenham Hotspurs chuan championship club Sheffield United an hneh lova, quarter-final lut zo lovin an tla. Tottenham an tlak lai hian Manchester United chuan West Ham an lehthal a, quarter-final an lut ve thung.
London club lian Tottenham hi championship club Sheffield United hmachhawn turin Bramall Lane-ah an lenglut a. Mimuala Sheffield an hmachhawn tum hian Tottenham manager Antonio Conte chuan team a siksawi chiam a, player tha paruk ngawt a awltir. Bench-a a dah zingah hian Son Heung-min, Richarlison, Lucas Moura leh Harry Kane te an tel. A player tha a awltir nual vang hian an khingpui turte a ngainep mah mah niin a lang a. A ngaihnep lakah an mualpho leh tak vangin Conte hian sawiselna nasa tak a tawk a. Sawisel hlawh zui viau mah se Kane a awltir vangin a inchhir loh thu Conte hian a sawichhuak zui tho thung.
Bramall Lane-a inkhel hmuhnawm ang reng tak hian hun rei tak chhung goal lut a awm theih loh hnuin minute 79-naah Iliman Ndiaye chuan he inkhela goal awmchhun hi a thun a. Team lian lakah Sheffield United chu hnehna chanpuiin, FA Cup quarter-final an lut zui ta a ni.
Shffield United hneh lova Tottenham an mualpho rual hian Premier League club Southampton chu an mikhual League Two team
Grimsby Town hneh lovin an mualpho ve bawk.
St. Mary’s Stadium a lenglut Grimsby Town tan hian minute 45+1-ah Gavan Holohan chuan hmahruaina goal a thun a. Second half tan atanga minute nga hnu lekah penalty an hlawhchhuah zui leh a. Penalty hi minute 50-naah Gavan Holohan hian chiang zetin a pet goal a, an goal hnihna a thun zui leh.
League Two team lakah si hnih ngawta an hnufual hnuin Saints in an si phurh sut ngei tumin tan an khawh zui a. Minite 65-naah Duje Caleta-Car chuan goal thunin an si phurh a sut then. An si phurh sut then bawk mah se goal dang an thun belh thei tawh lova, an tualzawlah ngei 2-1 a tlawmin an mualpho a, quarter-final an lut zo ta a lo a ni.
Tottenham leh Southampton an mualpho lai hian Burnley chuan Turf Moor-a an mikhual BurnleyFleetwood Town chu si khat faia hnehin quarter-final an lut ve thung.
United in West Ham lehthal
Nilai zana FA Cup inkhela inkhel ngaihven hlawh takah Manchester United chuan Old Trafford-a an mikhual West Ham United lakah si an phur hmasa zet a. Goal chhuah hmasa zawkah tang mah se Red Devils hian 3-1 in an mikhualte an lehthal a, quarter-final an lut.
Old Trafford-a inkhel hmuhnawm takah hian chawlhlawk hmain goal lut a awm thei lo zet a, chawlhlawk hnu lamah goal li ngawt a lut ta thung. Minute 54-naah Saïd Benrahma chuan West Ham hmahruaina goal a thun ta nawlh. Old Trafford-ah goal thun hmasa zawkah tang mah se Hammers hi an vanduai a, an mahni vekin an khingpui si phurh an sut sak. Minute 77 naah Nayef Aguerd chuan an lamah a ti-goal a, United in an si phurh an sut.
1-1 a nih hnuin goal dang a luh belh thei lawk lova, inkhelh nawn leh ngai turin an inhnehtawk ngei dawn niin a lang hman. An mualah chan chak zawh loh mai a rinawm hman laiin United chuan Sir Alex hnuaia an chin than an rawn ching thar leh a, hun tawp dawn hnaiah goal hnih ngawt thunin, hnehna chhinchhiahtlak an chang.
Hun tawp dawn tep minute 90-naah rawlthar duhawm Alejandro Garnacho chuan United hmahruai letna goal a thun a. Minute 90+5-a Brazil midfielder Fred chuan an chakna nem nghet turin an goal thumna a thun zui leh zat bawk. Tichuan, FA Cup-a champion ngun ber da Manchetser United chuan 3-1 in an mikhual West Ham an hneh let a, trophy lian dang lak belh leh thei turin FA Cup quarter-final an lut zui ta a ni.
FA Cup a\angin Tottenham an tla
