Pathianni khan FA Cup quarter-final an inchingfel a, last four lama intum tur pawhfel a ni ta.
Kum 1987 hnu lama a vawi khatna’na FA Cup semi lut Leeds United chuan Chelsea an tum dawn a; final luh inchuh match dangah Manchester City leh Southampton an innuai ve thung ang.
Wembley khelmual ngei maia west London club palian Blues hmachhawn tur Leeds hian kum 39 hnuah FA Cup semi-final an chuangkai leh ta nawlh a; he hmun thleng turin Pathianni khan Daniel Farke-a team hian anmahni ang bawka Premier League relegation pumpelh tura a kaw tawpa tan khawh ve mek dang West Ham United chu penalty petah 4-2-in anhneh a, hun pangngaiah team pahnih hi 2-2-in an inhnehtawk a ni.
Tarlan tak angin, FA Cup last four an luh hnuhnunber tum khan Leeds United hi champion zui ta Coventry City chuan Hillsborough-ah 3-2-in an hneh a; chu mi hma kum 1972 kha FA Cup-a Leeds champion awmchhun a ni.
He tournament-a tum riat ngawt champ tawh Chelsea leh Leeds intawng leh tur hi kum 1970 final hre pha chinte tan chuan lung tileng a chang thei dawn a; kha final-ah khan Old Trafford replay an khelh hnuah Blues an chak a, kha mi tuma an lungngaihna kha Leeds hian phuba lak duhna chhanah an la ngai nghet ngeiin a rinawm!
Nikum final-a chak zo ta lo City chuan last four inkhel pakhat zawkah Championship club Southampton an tum dawn a; kum 1976-a an champion tih loha FA Cup trophy dang chawi lo Saints hian karliamta Inrinni khan beisei loh tak maiin Premier League hmahruaitu Arsenal an hneh khiah a, vawi sarih champion tawh Manchester City lakah ‘upset’ dang an beisei leh dawn a ni.
Kumin semi-final hi Wembley khelmual ropuiah April ni 25-26 chhunga khelh tur a ni.
FA Cup semi-final ties:
Manchester City v Southampton
Chelsea v Leeds United