Fai intihsiakna tur khuhhawng tan
UD&PA department-in district hrang hrang fai leh thianghlimna lama intihsiakna bultanna atan district thenkhat chuan Zirtawpni khan Mizoram Cleanliness Competition 2025 an khuhhawng a, faina beihpui thlak nghal a ni.
Fai intihsiak khuhhawnnaah hian intihsiak kalpui dan tur, endik dan tur, district an endik hun tur leh result puan hun turte inhrilh a ni a. A kaihhnawih sawrkar department, village council, tlawmngai pawl leh sawmbikte an tel a ni.
Champhaiah chuan district bawrhsap Mohammad Aaquib chuan a khuhhawng a. Champhai district tihmingthatu Hnahsin Kut chu bawlhhlawh awm lo (litter free) a siam tum a ni tih a sawi.
Siaha-a khuhhawngtu addl DC Abraham Beirazi Khithie chuan, hun reiloteah Siaha chuan bawlhhlawh sawngbawlna changtlung (Solid Waste Management Centre) hman theih turin a nei tawh dawn a, awmze nei zawka bawlhhlawh sawngbawl kawngah nasa takin a pui dawn tih a sawi. Construction & demolition waste, hospital waste, single use plastic leh bawlhhlawh hrang hrang pawh awmze nei zawka thliarhran a ni tawh dawn tih a sawi bawk.
Serchhip-a khuhhawngtu district bawrhsap Paul L Khuma chuan, an district-in district fai intihsiakah tum hnih pakhatna an nih tawh hnu ah, nikumah pathumnaa a tlathla chu pawi a tih thu sawiin, nasa zawka tang turin district mipui a fuih. School leh zirna in dang pawhin kartin Cleanliness Drive nei se, khawtlang pawhin a tam thei ang ber faina hnatlang nei thin se a duh tih a sawi bawk.
Lawngtlaiah chuan bawrhsap Donny Lalruatsanga’n a khuhhawng a. Faina inelnaa tehfung hrang hrangah eng tehfung berah nge kan hnufual tih hre turin tehfung hrang hrang zirchian a tul tih a sawi a. Tehfunga hnufualna bikah theihtawp chhuaha hma lak a pawimawh hle dawn tih a sawi a ni.
District fai inelna hi December 2025 atanga January 2026 inkarah endik a ni anga, 2026 January 26-ah result puan a ni ang.
Fai intihsiakna tur khuhhawng tan
