Daily Newspaper

Farm Reform Bill hi loneitute tan a tha – BJP

9

Centre-a NDA sawrkarin loneitute tana Farm Reform Bill a siam dodaltu eptu party thenkhat chu an sawrkar laia hetiang bill pass tuma hma la leh phusa tak tak an ni tih BJP chuan an sawi.

BJP Mizoram State hruaituten thuthar thehdarhtute hnena an sawi danin, sawrkar laipuiin Agri-reforms Bill a siamthat chu eptu party-ten Farmer Union fuihpawrhin an dodal a, a dodaltu zinga phusa deuh nia hriat chu Congress party leh NCP an ni tih an sawi.

Congress party hian Lok Sabha 2019 manifesto-ah khan Agriculture Product Market Committee (APMC) Act leh Agri-Trade free from all restriction chu siam an lo tiam tawh zawk nia sawiin, Congress hruaitu Rahul Gandhi pawhin 2013 khan an sawrkarna state tinte hnenah ziakin Fruits & Vegetables chu APMC atanga paih tur leh open market ni tawh turin a lo hrilh tawh tih an sawi.

NCP hotu Sharad Pawar pawhin UPA hunlai khan Union Agriculture minister hnenah ziaka thlenin, private sector tichak turin policy thara thlak a lo rawt tawh bakah 2005 khan Sharad Pawar hian APMC Act chu thla 6 chhunga tihbo vek a duh thu a sawi tih BJP hian an sawi a ni.

“Heng party-ten farmer-te tana an duh leh an nawr thin chu, Pu Modi kaihhruai sawrkar chuan a tihlawhtling a, an dodal leh ta si hi double standard dik tak a ni,” an ti.

Tunhmaa Planning Commission, tuna NITI Aayog tih tak chu Inter-State Agriculture Product Trade leh Commerce Regulation Act, UPA hunlai atanga an lo sawi thin kha a ni tih an sawi bawk.

Mipui hamthatna tur an duh reng pawh politics avanga an duh leh loh thin chu ram hmangaih tak tak hruaitu an ni lo tih a chiang tih BJP Mizoram hruaitute hian sawiin, “He Farm Bill hian a tum tak, loneitute hamthatna tur a ni a, Mizorama loneitute pawh a chhawrtu tur kan nih dawn avangin ngun taka zirchiang a, he bill that zia hi hmufiah theuh turin kan sawm a ni,” an ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy