Daily Newspaper

Farm Sector Bill duh loh avangin Union Minister bang hmak

34

President Ram Nath Kovind chuan nimin khan farm sector bill pahnih duhloh avanga Food Processing Industries Minister Harsimrat Kaur Badal banna thehluh chu a pawm.

Shiromani Akali Dal leader hian Ningani khan banna a lo thehlut tawh a ni.

“President of India chuan Prime Minister thurawn angin Union Council of Ministers atanga Harsimrat Kaur Badal banna a pawm” tiin Rashtrapati Bhavan thuchhuah chuan a tarlang.

Prime Minister thurawn ang bawkin President chuan Cabinet Minister Narendra Singh Tomar chu Ministry of Food Processing Industries lo hmui rih turin a ti bawk a.

Tomar hian Ministry of Agriculture and Farmers Welfare, Rural Development Ministry leh Ministry of Panchayati Raj te a enkawl a ni.

“Anti-farmer ordinance leh legislation duhlohna avangin Union Cabinet atangin ka bang a. Loneitute fanu leh unaunu ka nih angin ka thlawp tlat thei hi ka lawm a ni,” tiin Badal chuan a sawi.

Eng vangin nge Agriculture Bills-in lawm a hlawh loh?
Agriculture reform bill pathum – The Farmers’ Produce Trade and Commerce (Promotion and Facilitation) Bill, 2020; The Farmers (Empowerment and Protection) Agreement of Price Assurance and Farm Services Bill, 2020 leh The Essential Commodities (Amendment) Bill, 2020 te chu Parliament-ah September 14 khan pharh a ni a, hei hian lockdown laia ordinance te a thlak a ni.

Opposition member te chuan Trade and Commerce ordinance leh Price Assurance ordinance te hi an duh lohna nasa taka an lantir chungin Agriculture Minister Narendra Singh Tomar chuan a pharh lui a.

Heng ordinance te hi India ram hmun tam takah loneitu leh loneitu pawl te chuan an duhlohna an lantir tawh a. Punjab Assembly phei chuan Centre ordinance hi an duhlohna resolution August 28 khan an lo pass tawh hial bawk.

Heng dan te hian State APMC law te a khawih danglam nghal vek a, eng vangin nge duhloh a nih?

Cooperative federalism
Agriculture leh market te hi State subject niin List II ah entry 14 leh 28 ah dah an ni a, he dan hi State te thuneihna chhuhsak tumna leh Constitution-a inbilh cooperative federalism spirit kalh an ti a. Centre thung chuan food items a trade and commerce chu concurrent litst ti thungin hei vang hian constitution kalh a ni lo, a ti thung.

MSP tihtawp
Farmers’ Produce Trade and Commerce (Promotion and Facilitation) hian Agricultural Produce Market Committee (APMC) pawna agricultural sale leh marketing te a hawn chu a tum ber niin inter-State trade a harsatna awm te nuai boin agriculture product a electronic trading framework a siam thung a. State sorkar chu APMC market pawnah market fee, cess emaw levy a lak a khap bawk.

Agricultural Produce Market Committee (APMC) te chuan APMC hi siam a nihna chhan chu leitu leh hralhtu inkarah dik taka thil a kal nan leh loneitu thlai thar man diktak hriatfiah a nih theih nan a ti a. AMPC hian loneitu thlai tharchhuah chu zawrhna kawngah a tha thei ang bera kalpui a nih theih nan a leitu hnenah license, commission agents leh private market, market fee lak leh he mi kaihhnawih thil pawimawhdang infrastructure siam thlengin thuneihna thui tak a nei a ni.

Sawiseltute chuan APMC thuneihna laksak hi food grains at minimum support prices (MSP) tihtawp tumna niah an ngai a. Centre in ‘one nation, one market’ a tih aiah ‘one nation, one MSP’ ni zawk se an duh thu an sawi.

Sawiseltute chuan loneitu tam tak ten an thlai thar atangin MSP an lak thu leh chu chuan APMC nena inzawmna a siam thu sawiin he State mechanism mamawh lova siam hi tuna tihmakmawh zawkah an ngai.

Contract farming framework
Farmers (Empowerment and Protection) Agreement of Price Assurance leh Farm Services te hi contract farming kaihhnawih niin farm tharchhuah lei leh hralh kalhmang siamtu tur a ni. He dana price framework pawm tlan hi loneitute tihchakna leh humhimna tura ngaih a ni bawk.

Ziaka inremna farm tharchhuah-ah tharchhuah a nih hma in neih vek tur a ni a. Hetah hian list fel takin supply, quality, grade, standard leh farm produce leh services man tin te chu ziahlan tur a ni.

Lei dawna pawisa pek zat tur chu inremnaah ziah vek tur a ni bawk a. A man inthlauhna leh danglamna awm theiah inremnaah chuan thil tharchhuah leina tur guranteed price siam tur a ni bawk a, hei bakah hian chiang takin a hmaa a man leh benchmark price ni thei awm ang te ziah lan tel tur a ni bawk a. Hei hi thil man lo bithliah lawkna niin inremna siamah a tepeng anga belh tur a ni bawk.

Price fixation mechanism awm lo
Price Assurance Bill hian loneitute chu a man chungchanga an chhiatna tur laka humhim tur a nih laiin price fixation chungchangah engmah ruahmansakna a nei lo.

Hei vang hian private corporate house te an duh ang thala chetlakna an neih theih nana thuneihna pek chuan loneitute chu an hlawk nan chauh an hmang ang tih hlauhna a awm a ni.

Contract farming hi India loneitute tan thil thar a ni lo va. Informal in food grains ah te, sugarcane leh poultry sector ah formal contract te hriat hran viau a ni. Sawiseltute chuan formal contractual obligation siam thar hian farm sector insingsa fel rih bawk si lo leh private corporate entity te nena indo turin resource neih bawk si loh nen thaah an ngai rih lo thung.

Food item khuahkhirhna hlih
Essential Commodities (Amendment) bill hian cereals, pulses, oilseeds, edible oils, oinion leh potato te chu essential commodities atangin a paih a. He dan hian heng thil te tharchhuah, dahthat, phurhsawn leh sem darhah khuahkhirhna a paihbo a ni. Central sorkar chuan indo lai emaw, tam tlak lai leh khuarel chhiatna avanga thil man a san lutuk in heng supply te hi a duh chuan a khuahkhirh thei thung a, thawnchuah thuah pawh thuneihna a nei thei.

Dan thar hian agriculrture tharchhuah te stock limit chu a man san leh san lohah teh tur a ti a. Horticultural produce ah retail price 100% laia a sanin, non-perishable agricutlure food items-ah retail price 50% laia a san in stock limit kalpui chauh tur a ti bawk.

Food security tihnepna
Punjab Chief Minister Amarinder Singh chuan food item-a regulation tihnep hian exporter, processor leh traders ten farm produce chu harvest season ah dah tha in a hnuah thil man san hunah an hralh chauh zel ang a ti a. Hei hian food security chu a tichhe dawna a chhan chu State in stock awmzah pawh a hriat dawn loh vang a ni, a ti bawk.

Sawiseltute chuan he dan hian essential items man nasa takin a thlak danglam ang a, black marketing a tipung bawk ang an ti bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy