Daily Newspaper

Farmer Award leh a kaihhnawih…

10

Agriculture leh a zawmpui peng dang Horticulture, Fisheries, Sericulture leh AH& Vety hnuaia eizawngtu hna thawk tha thlan chhuah mi panga hnenah nimin khan Agriculture minister chuan State Level Best Farmer Award 2019-2020 a hlan tih sawrkar thuchhuahah tarlan a ni a. Hetianga kuthnathawktute chawhphur nana award buatsaih a ni hi a lawmawm hle a, hei hian hun lo kal zel turah pawh rah tha tak a chhuah zel a rinawm.

Hetih lai hian, farmer-te puala award buatsaih dan kimchang hi sawrkar thuchhuahah tarlanna a awm lo va. Hriat theih chinah, award dawng tur thlannaah hian, ATMA chuan tehfung siamsa neiin chumi hmang chuan official ten farmer-te hnathawhna hmunte tlawhin an hmalaknate a takin an endik a, anmahni kawmna te an neih hnuah award dawng tur hi thlan chhuah an ni.

Award buatsaih a nih chuan, tehfung siam hi chu tihmakmawh a ni teh meuh mai; chutih laiin, farmer-te dinhmun a inchen loh zung dawn avangin, category hrang hranga thliar sin leh deuh ni thei se, farmer-te pawh a huapzo lehzual ang a, chu chuan sector harng hranga eizawngtute a chawhphur bakah hmasawnna tha zawk a hring chhuakin a rinawm a ni.

Entirnan, farmer zingah dinhmun tha sa deuh chin thliar hrangin, chu chu category khatah dahin, tehfung pawh a hranpa siam ni se. Tlema an eizawnna kawnga dinhmun la tha lo deuh chin category dangah khungin, sawrkar lamin tanpuina inang tlang thap pein, chumi an peipun dan chu tehfung pakhatah a hman theih nghal ang a. Sector tina eizawnna bultan tir te chu category hranah khung lehin, heng mite hi sawrkar pawhin an bultanna tur pe vawng deuhvin, chumi an peipun dan chu tehfung pakhatah hman ni leh bawk se. Hetiang hian Sector tinah category pathum theuh siamin, farmer zawng zawng huapzo siin award hi a buatsaih theih dawn a ni.

Hei bakah hian, thalai hna thawh tur nei lote hi, agriculture leh a behbawm sector hrang hrangah te hian bul an tanna tur sum tumsakin award te pawh siam ni zui ta se, chu chuan ei leh bar tharchhuah kawngah leh eizawnna siam kawngah awmzia thui tak a neih a rinawm. Hetianga hmalakna atan hian sum sen tur hi a hautak lutuk hran lovin a rinawm.

‘Hnathawhna tur ram kan la nei zau, thawh tur a tam’ tih ringawt infah reng hi chuan awmzia a nei tak tak lo tih chu a takin kan tawng mek a. Sawrkar awm chhan chu mipuite hamthat tur chhawpchhuahsak a ni a, chumi chhawpchhuah chu tha takin bawhzui a ni em tih vil leh enzui pawh sawrkar tihtur niawm tak a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy