Inrinni zana Spanish La Liga khelhah hmahruaitu FC Barcelona chu an mikhual Las Palmas hneh lovin an tlawm a, an hmahruaina a derthawng ta hle. An mualah Barca an tlawm laiin Madrid club lian Atletico Madrid erawh chuan Mimualah awlsam takin hnehna an chang ve thung.
Catalan club lian FC Barcelona hian an kum 125 tlina champha phakah table mawngphah lama awm mek Las Palmas an mikhual a, an anniversary lawmnaah chak theihna hun tha an nei. Hansi Flick hnuaia khel tha tak Barca hi mak tak maiin an mualah an talbuai ta tlat thung a, goal thun theihna hun tha an neih an hlah tluk tluk. Chawlhlawk hmaa goal lut a awm theih loh hnuin second half tan atanga minute lina lekah mikhual team Palmas tan Sandro chuan hmahruaina goal a thun a, mualneitu Barcelona a barakhaih.
An mualah ngei goal an chhuah hnuin Barcelona an harh thar a, na taka an mikhualte nawrin goal pawh an thun ta nge nge. Hansi Flick hnuaia vul thar tak Raphinho chuan minute 61-naah goal thunin an si phurh a sut. An si phurh sut bawk mah se Barca hi an tlarhnung a phui lova, goal an chhuah leh thuam. Goal an chhuah atanga minute 6 hnu lekah Fábio Silva chuan Las Palmas hmahruai nawn lehna goal a thun a, he goal hi hun tawp thlengin Barcelona in an sut thei lova, 14-naa awm mek lakah Palmas lakah tlawmin an mualpho zui ta a ni.
Las Palmas lakah an tlawm tum hian Barcelona hian shot vawi 26 zet an nei a, hei hi season tharah shot an ngah ber tum ni bawk mah se an tlawm loh phah chuang lo thung.
Table hnuai lama awm Las Palmas lakah an tlawm vangin FC Barcelona hmahruaina a pan ta hle. Barca hian khelh 15 atangin point 34 an hmu a, point hnihin hma an la hruai. An hnuai chiaha awm Atletico Madrid nen an khelh zat a inang a, Atletico hian point 32 hmuin pahnihna an luah mek. Barca leh Atletico madrid te hi table chungah la indawt mah se champion lai Real Madrid aia an khelh hnem zawk vangin an dinhmun a him lo hle. Real hian khelh 13 atangin point 30 an hmu mek a. An chunga awm mek Barcelona leh Atletico Madrid te khelh zat an khelh a, an chak ve ve a nih bawk chuan table chung berah an awm daih thei dawn.
An mualah ngei Barcelona an tlawm laiin Atletico Madrid chuan José Zorrilla-ah Real Valadolid an luhkhung a, mikhual an nihna hmunah si nga fai ngawtin hnehna an chang.
Atletico Madrid tan hian Clément Lenglet, Julián Álvarez, Rodrigo De Paul, Antoine Griezmann leh Alexander Sørloth ten goal khat theuh an thun. Mimualah an chak vangin Atletico Madrid hian an elpui lian Real Madrid an lehpel a, pahnihnaah an inhlangkai. Pathianni zanah Real Madrid an chak a nih chuan Atletico hi pathumnaah an tlahniam ve leh thung ang.
FC Barcelona an tlawm
