Zo Re-Unification Organisation (ZORO) chuan Mizoram sawrkarin Forest Conservation (Amendment) Act 2023 a adopt chuan Zofate tan harsatna nasa tak a la thlen thei tih a sawi.
ZORO vice president L Ramdinliana Renthlei chuan, FCAA 2023-in ngaihhnathiam (exempt) tura a dahah international boundary atanga km.100 chhung chu sawrkar laipuiin a duh anga, state sawrkar leh village council /gram sabha, NGO-te rawn lo pawha a hman theih turin thuneihna a la a. Forest clearanace lak buai ngai loin hma a la thei tih a sawi.
“FCAA 2023 hian India danpui Article 371G-a kan inhumhimna tura min pek zawng zawng a kalh fai vek a, chanvo min pek a rapbet vek a, indigenous peoples chanvo chhuhsakna a ni tih sawiin, FCAA chu Parliament Act a ni a, Article 371G erawh India danpui a ni a. Democracy-ah chuan danpui a lalin thu a nei zawk a ni,” a ti.
FCAA chu Supreme Court pawhin a ngaihtuah lai mek, thutlukna a la siam theih loh lai leh line of control pawh an la sawifiah theih loh lai a, Mizoram sawrkarin a lo pawm ngawt chu a fel lo hle a, thangthar lo awm zel turte hmakhua a tichhe thei dawn a, he thil hi Zofate pawisawina lian tak a ni tih a sawi a ni.
FCAA 2023 hian kan fundamental right a bawhchhiat avangin Indian Constitution Article 13 sawi anga he Parliamentary Act hi tihtawp mai emaw Indian Constitution-in dikna chanvo min pek anga her rem chi nia a lan thu a sawi bawk.
“Kan ram leh hnam tan a him lo nia kan hriat avangin FCAA 2023 hi kan pawm thei loa, Mizoram sawrkar hian central beng a thlen hma ngeia ngaihtuah tha tur leh, a tul anga Special Assembly pawh koa ennawn leh turin kan ngen a, Mizoram sawrkarin a ngaihtuah tha lo a níh chuan a tawp thlengin hma kan la dawn a ni,’ ZORO hruaitu chuan a ti.
FCAA 2023-in a kalh nia sawite:
8 India danpui Article 244 a kalh a. He Article hmanga siam Fifth leh Sixth Schedule-in ADC, UT leh state thuneihna leh dikna chanvo a chhuhsak.
8 India danpui Article 19-na a bawhchhia a, he article-in khua leh tuite chanvo min pek – Freedom of Residence and Settlement, Freedom of Occupation, Trade, Profession a bawhchhia.
8 India danpui Article 21-na in chanvo min pek heng – zalenna, tribal-te ramngawa an eizawnna, hriselna tha leh boruak thianghlim, environment, mimal tinte dikna chanvo a tichhe thei.
8 Tualto hnamte tana inhumhimna tur, UN Declaration on the Rights of Indigenous People 2007 Article 13, 15(2), 17(2), 21(1), 24(1) leh 25 nasa takin a bawhchhia.
FCAA 2023 doin a tawp thlengin ZORO kal tum
