FCAA-in Zoram a tiderthawng
– AAP Mizoram
Aam Aadmi Party Mizoram chuan Forest Conservation Amendment Act 2023 chuan Mizoram himna a tiderthawng a, Special Assembly Session koha sawiho that leh an phut tih an sawi.
AAP Mizoram thuchhuak chuan, Mizoram Legislative Assembly-in a pass tak FCAA 2023 chungchangah chief minister hnenah lehkha an thehlut tih a sawi a. An lehkha thehluhah hian he dan pawm a ni hi an dem a, Mizoram mipui dikna leh himna chanvo derthawng ta chu an ngaihpawimawh ber a ni tih a sawi a ni.
He danin a huam loh, rel kawng leh kawngpui lian, India hmasawnna atana international border atanga km.100 hman phal a ni chuan Mizoram pum ramngaw leh Mizo mipui leh a chhunga nungchate himna nen a tiderthawng chu hlauhawm an tih thu a sawi a. He dan hian a ramchhung himna chiang takin a sawifiah lo chu an mut ti tui lotu a ni tih a sawi.
‘He dan hian ram leilungfa himna leh dikna a tiderthawng a; hmasawnna ruhrel/ venhimna atana ramngaw thiah a ngai tur hian kum 2021-a COP26 Glasgow Scotland-a Prime minister Narendra Modi-a’n India ram chu kum 2070-ah chuan Net Zero Emission – boruak chhia siamchhuah tawh loh a tum tih a sawi chu a kalh a ni,’ AAP Mizoram hian a ti a. Mizoram mipui aia central lam thuneihna sang zawk tur hi a thlen an remti lo tih a sawi a ni.
State assembly-in FCAA 2023 a pass tak avanga Mizoran humhimna bik danpui 371 G hlutna leh tangkaina a bo ta chu an duh lo tih sawiin, Special Assembly Session ko a, FCAA 2023 sawiho that leh; FCAA 2023 hnawl emaw a dan ennawn; mipui ngaihdan sawipui a, mipui tam zawk duhdana kal; India danpui hnuaia 371 G hi engti zawng pawha humhalh tih chu an thil phut a ni tih a sawi.
FCAA-in Zoram a tiderthawng – AAP Mizoram
