Sairanga FCI kudam sak hna chawlh lailawk meka harsatna awm chinfel dan dapin larsap Indra Sena Reddy Nallu chuan Thawhlehni khan Land Revenue & Settlement, Environment Forests & Climate Change leh Food Corporation of India hotute a sawipui.
Larsap chuan hmasawnna ruhrel pawimawh siam a nih hmain nakin lawka harsatna a awm loh nana fimkhur tlan a tul tih a sawi a. A kaihhnawih department hrang hrang inkarah thawhhona tha a awm a pawimawh tih a sawi.
FCI kudam chu Mizoram mipui tana pawimawh tak a nih avangin sawrkar laipuiin a phut angte pawh a ranglama bawhzuia chinfel thuai tum tur leh, FCI kudam sak hna tawpsan lailawk chu tan leh thuai a nih theih nana tan la turin official-te a chah. Project tan tawh leh kalpui mek, engemaw rokhawlhna avanga tawp lailawk chu chinfela zawhfel thuai a tul tih a sawi a ni.
Sairanga FCI kudam sak hna kalpui tawh dan leh thlen chin, Forest department atanga Riverine Reserved Forest (RRF) tia tawpsan rih tura hriattirna (stay order) pek chungchang leh ministry phut anga hmalak ngaite sawiho a ni a. Hemi atana compensatory afforestation (CF) tur ram dawnfel a nih tawh thu sawi bawk.
FCI kudam sak mek chu project pawimawh tak leh Mizoram tana tangkai tur a nih avangin, tikhawtlai zel loa puitlin thuai a nih theih nan hma lak ho dan tur sawiho a ni.
Tarlan danin, Sairanga FCI kudam sak hna hi kum 2021 vel khan FCS&CA deparment ram hectare 3.1 vela zau hawhtira sak a ni a. Buhfai metric ton 10000 leng thei tura ruahman niin, building pathum sak tur zingah buhfai metric ton 5000 leh MT 2500 leng building sak zawh thawkhat a ni. MT 2500 leng building pakhat leh a kentel pawimawh dang sak hmabak a la awm.
FCI kudam sak hna chawlhsan tak chhunzawm dan larsap-in a sawipui
