Daily Newspaper

FCRA license paihsak zingah Kristian pawl 4 awm

15

Union Home Ministry in Foreign Contribution Regulation Act (FCRA) hnuaia NGO paruk license a tihtawp zinga pali chu Christian association te an ni. FCRA license hi non-profit organisation tena foreign fund an dawn theih nana tihmakmawh a ni.

US-a inbun Christian donor pahnih dangte pawh NGO leh group-te hnena fund pek thuah Ministry enthlak zingah an tel thu senior government official chuan a sawi bawk.

“US-a inbun evangilical donor tena nghawng an neih chungchangah ngaihthat lohna a awm a, chung zingah chuan Seventh Day Adventist Church leh Baptist Church tena India association an tanpui a tel a. Chhui chian mek a ni” tiin official chuan a sawi.

Kristian group pali FCRA paihsak takte hi Ecreosoculis North Western Gossner Evangelical, Jharkhand, Evangelical Churches Association (ECA), Manipur, Northern Evangelical Lutheran Church, Jharkhand leh New Life Fellowship Association (NLFA), Mumbai te an ni a, eng vanga tihtawpsak nge tih leh eng nge bawhchhiat an neih tih chu tarlan a ni lo.

Vishwa Hindu Parishad (VHP) youth wing Bajrang Dal te chuan kumin April thla leh nikum September thla khan Mumbai-a NLFA tena prayer meeting neih an tum an lo tibuai tawh a. Hindu religious group-te chuan heng meeting-te hi sakhaw danga inlehtir nana hman a ni tia sawiin police-te hnenah an zualko nghe nghe a ni.

NLFA-te FCRA license hi February 10 khan tihtawpsak an ni tawh a. NLFA website-ah chuan an group chuan India ramah kum 1960 chho atang khan New Life Churches of New Zealand missionary tena 1964 a India rama rawngbawlna an tan atanga bultan an nih tawh thu an sawi.

Evangelical Churches Association (ECA) hi kum 1952 khan Manipur-ah din a ni a. A bul thut tak chu kum 1910-a Weslsh Presbyterian missionary ten kum 1910 daih tawha an tlawh atanga intan a ni.

Ecreosoculis North-Western Gossner Evangelical te hi Chhotanagpur region-a Germnay atanga Grossner mission te hnathawh kal zel chu a bulthut a ni thung.

Northern Evangelical Lutheran Church hi kum 1987 khan din ni thungin Lutheran tradition duhtu khawvel huapa kohhran hrang hrang 148 inzawmkhawm zingah an tel a, he kohhran inzawm khawmah hian ram 99 atangin Kristian maktaduai 77 an awm a ni.

India ram chhungah organisation, association emaw NGO tute pawhin FCRA license an nei lo a nih chuan foreign fund an dawng thei lo va, FCRA license hi Home Ministry pek chhuah a ni. FCRA license tihtawp sak a nih chuan NGO te chuan foreign fund an dawng thei tawh dawn rih lo tihna a ni.

Pawl pahnih dang an FCRA tihtawpsakte hi Rajnandgaon Leprosy Hospital and Clinics, leh Don Bosco Tribal Development Society te an ni.

Kum 2017 khan US-a inbun Christian donor, Compassion International te chu Home Ministry in sakhuana inlehtirna lama chet la thin NGO te sumah an pui tiin India rama a chetlak a lo khap tawh bawk a. Khatih laia Home Secretary Rajiv Mehrishi chuan ‘Compassion-te hian FCRA guidelines an zawm lo’ tiin a lo sawi tawh.

Kha mi kum vek khan Home ministry chuan NGO pahnih Bloomberg Philanthropies, U.S. billionaire Michael Bloomberg-a din atanga sumdawng thinte FCRA license a tihnunsak duh tawh lo bawk a. Hemi hma kum 2015 khan Prime Minister Narendra Modi leh New York mayor tena inkawmna an neihah Bloomberg Philanthropies te tanpuia India rama Smart cities din turin inremna an siam thung.

Tun dinhmunah FCRA hnuaiah NGO emaw association in register 22,457 an awm mek a, license paihsak 20,674 an awm thung a, 6,702 te chu an license thi tawh anga ngaih a ni thung.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy