Daily Newspaper

Fed Cup hming thar Billie Jean King Cup

16

Hmeichhe tennis-a ram leh ram inelna ngaihhlut hlawh ber Fed Cup tih thin kha tunah chuan hmeichhe tennis-a player ropui Billie Jean King chawimawina atan Billie Jean King Cup tiaq thlak fel a ni ta.

Billie Jean King chuan Fed Cup tournament hmasaberah United States chu kum 1963 khan a champion-pui a, hetia a hmingchawia competition hming phuah thar a nih hnu hian pitar kum 76 mi chuan Reuters hnenah inthlahrung takin a chhuang hle tih a sawi.

King chuan, “Ka huntawn chu mumang ang mai lah ni. He tournament-in khawvel huapa hmeichhe tennis a chawikan dan pawh ka ngaihtuah a; Davis Cup khelh tan atanga kum 63 hnuah hmeichhe lamin kan tan ve chiah a, tunah chuan a tira ram 16 lek atangin ram 116-in he tournament hi an khel ta.

“(Mipa inelna) Davis Cup nen prize money pawh a intluk chiah tawh a, he thil hi a pawimawh hle a, intluktlanna lantirna tha tak a ni,” a ti.

Kumin Fed Cup finals hi April thla khan Budapest khawpuia khelh tur a nih laiin hripui avangin an khel dawn ta lo a, International Tennis Federation (ITF) thuchhuahin a tarlan danin kumthar atang chuan Billie Jean King Cup tih a ni tawh ang.

Grand Slam singles title 12 la tawh King hi Women’s Tennis Association din-chhuaktu niin, a hming chawia Fed Cup an siamrem t^k hnu hian hmeichhe hminga khawvel huap team competition lian an dah hmasakber a ni ta a; nakum Hungary ran Finals-ah hian prize money-ah US dollar 12 an semral dawn a, chu chu tunhnaia tuaithar ve bawk mipa inelna Davis Cup-a an sum semchhuah tur zat chiah a ni.

ITF President David Haggerty chuan sport leh society-a hmeichhia leh mipa intluktlanna tura a beihna kawngah King a fak a, “Kum 1963-ah champion hmasa-ber US team tan Fed Cup hmasaber a khel a, WTA a a dinchhuah bakah president hmasaber niin, hmeichhe infiammi zinga U.S. Presidential Medal of Freedom dawng hmasaber Billie Jean King hian bungthar kai a thulh thei lo.

“Vawiinah pawh hmasaber nihna a hauh leh a, he hming thar hi a thiltih tawhte khan a phu hliah hliah a ni,” a ti.

Tarlan tak angin, competition an din kum, Federation Cup tih a nih laiin London-ah US team a champion-pui a; he inelnaah hian player niin vawisarih a champion a, captain ni chungin he trophy hi vawili a la leh bawk. Nikum khan he competition Global Ambassador hmasaber atan ruat a ni nghe nghe.

Hmingthar hnuaia Billy Jean King Cup Finals hmasaber hi nakumah France, Russia, Hungary, Australia, Belarus, Belgium, the United States, Spain, Slovakia, Czech Republic, Germany leh Switzerland-te’n an khel dawn a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy