Land Revenue & Settlement department chuan felfai zawkin ‘land bank’ neih an tum a. Awlsam leh tha zawka mipuiin an dawr theih nan land reform kalpui hma in administrative reform kalpui tel an tum.LR&S minister B Lalchhanzova sawi danin, sawrkarin chhan hrang hrang avangin ram ruak, ram awl a mamawh thin a. Khuarel chhiatna, tunhmaa ram pek thuah leh inhmun thuah bakah mi harsa leh mamawhte tan ram mamawhna a sang thin a. Sawrkarin house site plan a regularise atangte, mimal ram divert leh sawrkar hmalaknaa ram zawl chhinchhiah chu ‘land bank’ ah dahkhawm thin a ni.
Land bank-ah hian ram tam zawk dah a nih theih nan leh a hmu tur leh mamawh diktak ten ram an hmuh theih nan, hmalam huna sawrkar project atana hman tangkai a nih theih nan, land bank hi mumal zawka kalpui turin system tha leh mumal duang tur Committee an din tih a sawi a. Committee rawtna chu a taka kalpui hunah chuan sawrkar land bank-a ram awm chu fekfawn leh dan ang taka hman a ni dawn anga, sawrkar leh public policy tih hlawhtlinna atan hman a ni dawn tih a sawi.
Land bank-a awm tur compensatory afforestration (CA) atan ram engemawzat chhinchhiah a ni tawh tih LR&S minister hian sawiin, “Mizorama project hrang hrang thawh tur lokal thin hi, project tlakna hmun forest area a nih hian chu ram lak tur aiah CA pek a ngai thin a. Ram zawn chawp chu buaithlak chang a awm thin. Mizoram district hrang hranga settlement officer te kaltlangin CA land tur hual lawk ram hectare engemawzata zau chhinchhiah a ni tawh,” a ti.
Tunhnaiah NH 306/ NH6, FCI kudam tur Sairang Dinthar, Mualkhang Bottling Plant atan hectare 332.811 pek a ni tih a sawi.
Awlsam, felfai leh tha zawka mipuiin Land Revenue & Settlement an dawr theih nan adminstrative reform hrang hrang ruahman a ni tih B Lalchhanzova hian a sawi a. Anmahni dawrtu mipui dawnsawn lamah tan la turin thawktute chah an ni tawh tih sawiin, dawhthei taka lo dawngsawng turin an inhrilh nawn bawk tih a sawi.
Sawrkar hnathawk tih awm loh tak, sum therhlo beisei ang chi ah, complaint mumal tak a luh a, finfiah a nih chuan an enliam dawn lo tih a sawi. “Department-a kha thawhpuite tan hei hi ngaihthlak hrehawm ni turah ka ngai loa, keima tan pawha sawi ka ni,” a ti.
Aizawl Municipal area-a chenna atana hmun him lo dapchhuah a, chenna atan phal loh bur tum a ni tih minister hian a sawi. UD&PA department-in ‘the Mizoram Urban Area Building Regulation 2024’ a tihchhuah zulzuiin, L&RS department chuan joint survey team dinin, high risk zone leh area specific hazard zone chin chhinchhiah turin map siam a ni anga, hemi huamchhungah chuan eng in mah sak phal a ni dawn loa, khauh takin kenkawh a ni dawn tih a sawi. Zawhna chhangin LR&S hotute chuan, an thil siam turah hian tuna LSC neihnsa sa ram chu a tel dawn loa, ram pek thar tur chauh a huam dawn tih an sawi a ni.
Hma lak tawh leh tum mek:
* Ram pass siam chhung rei lutuk tihtawi dan kawng dap a ni a. A bikin LSC siam dawna kalkawng thui lutuk chu rang zawka pekchhuah theih dan ruahman a ni.
* Tunlai thiamna thang zelah e-office a luh tum a ni a. Minister leh hotu dang zinbo avanga file tang thin pawh, an awmna hmun atanga file en a, sign ngai sign mai theih dan tur thlenga duan tum a ni.
* AMC area-a house pass dilna form, minister-a dil kher ngai thin chu mipui awlsamna atan tih tawp a ni a. Kumin January 25 atang khan he thuneihna hi director kuta hlan a ni.
* Ram neih dan dinhmun tihchian nan leh vawnhim nan department-te landlease nei vek tur leh hung tha vek tura hriattir an ni tawh a. Hetah hian central leh state sawrkar department-te an tel.
* Sawrkar hmasa lama Council of Minister-in an lo rel tawh angin, GAD nen inzai chungin zelin Govt. Complex/ Ainawn Venga ram lo luah tawhte chu a tul anga pek ngheh (regularise) tum a ni a. Kalpui dan tur erawh sawrkarin a la duang dawn a ni.
* Minister office bakah directorate leh district office zawng zawngah complaint box hun a ni a; mipuiaw.mizoram.gov.in ah harsatna leh rawtna thlen theih a ni bawk. Tun thlengin complaint box-ah hian complaint 17 a lut tawh a, buaipui mek a ni. Mipui Aw ah hian 13 a lut tawh a, pakhat tih loh chu chhan fel a ni tawh.
* LR&S department hnuaia directorate/ district a case pending neih dan chu – directorate-ah 2869, Aizawlah 1526, Lunghlei 710, Champhai 2377, Serchhip 2182, Kolasib 3052, Mamit 793, Khawzawl 349, Saitual 4, Hnahthial 46. Pending zingah kum 2021 thlenga dawn tawh chin chu kumin June-a clear vek tura tih a ni a, a result hi thlirlet ala ni rih lo.