Massachusetts Port Authority, Boston chuan FIFA World Cup 2026 urlawk nan record siam thei khawpa ball lian an siam a, June thla hian Piers Park II, East Boston-ah phochhuah an tum. He ball lian hi Boston lawngchawlhna atanga lang thei turin an hung chhuak dawn a, World Cup match Boston-a an thlen ve tur lo urlawk nana an tih a ni.
He football lian hi feet 45 a sang niin, tuna Guinness World Record-in khawvela football lian ber record a an puan lai chu Doha, Qatar-a 2013-a an siam niin, feet 38 leh inches 11.8 a sang a ni a, hei hi Boston hian a rawn khum ta a, mahse, Guinness lamin official-in an la teh lo.
Massport CEO Rich Davey chuan, “Massachusetts-in FIFA World Cup match kan thlen turah Boston chu khawvel mikhual turin kan inhawng e. East Boston-ah he ball lian thlir turin a awm dawn a, mipui min tiphur lehzual ngei ang,” a ti.
He ball lian an phochhuah bakah Massport chuan June ni 13 chhun dar 12:00 atanga tlai dar 4 thlengin Piers Park II-ah World Cup lawmna hun an buatsaih dawn a, he event-ah hian chhungkaw kima kal theihna chi intihhlimna chi hrang hrang an buatsaih dawn bawk a ni.
Boston hian FIFA World Cup 2026-ah hian match sarih an thleng dawn a, Gillette Stadium, Foxborough-ah heng World Cup match-te hi khelh a ni ang.
FIFA World Cup urlawk nan football lian ber an siam
