District hrang hranga kalpui FOCUS project chu a tawp dawn tak avangin District Management Unit (DMU) chuan an hnuaia farmers interest group (FIG) hnenah hma an lakna thil hrang hrang an hlan mek zel a. Ningani khan Champhai leh Saitualah pawh inhlan a ni.
FOCUS DMU Champhai kalsan tur inhlanna hi district bawrhsap VL Remliana chuan a hmanpui a. FOCUS project hi Champhai district-a khaw 60 ah kalpui niin, staff 43 an awm a, FIG 586 hnuaiah kuthnathawktu 10382 an inziaklut a ni. FOCUS hnuaiah hian line department pali – Agriculture, Horticulture, Soil leh Vety an awm a. An hmalakna langsar zingah – thlai chi sem, vawk, ar leh kel note sem, Boar Semen Station din, tui dahkhawlna siam, lei chung hang luangral tur venna – check dam siam a tel. FOCUS hnuaiah hian Integrated Farming System hlawhtling takin Chhungte, Hmunhmeltha leh Samthangah kalpui a ni bawk.
Khaw hrang hranga loneitu intelkhawm – farmers interest group (FIG) hnenah FOCUS hmanga hmasawnna ruhrel din – check dam, water tank, agriculture link road, horticulture link road, farm link road, water harvesting structure leh a dangte hlan a ni.
Saituala inhlanna hmanpuitu district bawrhsap Dr Lalngura Tlau chuan, FOCUS project a tawp dawn tak avangin a neitu nihna chu FIG kutah a awm tawh dawn tih a sawi a. Sawrkar scheme angah chuan project-a awmin period a zawh chuan a neitu hnena hlan a ngai thin ang hian, enkawl zui chu an kutah a awm tih a sawi. Enkawl a, chhawmnung a, eizawnna ngelnghet leh hlawk zawka thlai an thar theihnan hmang tangkai turin duhsakna a hlan tih a sawi a ni.
Saitual district-a FIG-te hnena FOCUS hnuaia hmalakna hlan chhawn tak zingah link road laih, suspension bridge, tanky, check dam adt. bakah mimal leh khawtlangin an chhawr theih tur thil siam a tel a ni.
Fostering Climate Resilient Upland Farming System in the North East (FOCUS) hi International Fund for Agriculture Development of United Nation hnuaia kalpui a ni a, externally aided project niin, Mizoram leh Nagaland-ah kalpui a ni. Kum 6 chhunga hmalakna tur a ni a, kumin January 31 hian a hun hi a zo dawn a ni.
FIG hnenah FOCUS kalsan tur hlan zel
