Site icon The Aizawl Post

Finance changtu kan nei tha lo – Vanlalruata

Mizoram budget ruahmanna bultumtu chhungkaw pa ber, finance changtu, Mizoramin kan nei tha tawkloa, ram leh mipui tan a vanduaithlak tih PC president Vanlalruata chuan a sawi.
Nilainia an party office-a Mizoram budget chungchang thlirhonaah PC president chuan, state budget thar 2023 -2024 chu cheng vaibelchhe 640.01 a indaihlo sa a bul tan tur a ni nghal a; cheng vbch. 272.33 puk belh chung pawha kumtawpa vbch. 628.51 a indaihlo tura chhut a ni, tiin, “Kan ram sum dinhmun hi a chhe chak hle,” a ti.
Kum 2021- 2022 a sum indaihlohna cheng vbch. 123.34 kan neih sa thu leh hemi kum hian vbch. 4595.03 pukbelh chungin kumtawpa indaihlohna kan neih chu vbch. 507.48 a nih thu te; kum kallai 2022- 2023 ah kumtirah indaihlohna vbch. 133.09 nei tura chhut niin, vbch. 2582.54 puk belh a nih thu te; kumtawpa sum hman ban vbch. 23.41 nei tura duan a nih thu te; puk tura ruahman aia tam vbch. 3197.23 puk chungin kumtawpa indaihlohna nia chhut chu vbch. 640.01 a nih thu leh kum kal tawh dinhmun thlirin a takah chuan hei aia tam a rin thu te a sawi a ni.
“Heng atanga en hian, kumin kumtawpa indaihlohna tura chhut cheng vbch. 628.51 hi vbch. 1000 a kai theih hial a rinawm a. Hetianga sum dinhmun a chhiat chak viau lai hian Mizoramin Finance minister tha nei angah kan la inngai thei em,” PC president hian a ti .

Exit mobile version