Finance Commission report thehlut
Second Mizoram Finance Commission chuan Ningani khan larsap Dr Hari Babu Kambhampati hnenah State Finance Commission report an buatsaih an thehlut a. Report hi larsap hian Finance department hnenah zirchian turin a thawn leh dawn a ni.
Larsap hnenah hian Commission chairman F Vanlalruata leh member secretary Lalmalsawma ten an hlan a. State Finance Commission hian state sawrkarin chhiah chi hrang hrang a lak atanga tualchhung sawrkar – village councils, municipalities leh autonomous district council ten an chan tur zat bituk, state sawrkar sum bawm atanga tualchhung sawrkar tanpuina grants -in- aid pek dan tur leh tualchhung sawrkar sum dinhmun siamthatna turte mumal taka an zirchian hnuah report hi an buatsaih a, report hian kum 2021- 2022 atanga 2025- 2026 financial year chhung a huam dawn a ni.
Commission hian kum khat leh thla 10 chhung a zirchian hnu ah report hi a thehlut a, he report hi state sawrkarin a lo zirchiana a pawm hnuah a bawhzui dan ‘action taken report’ hi India danpuiin a phut angin, State Legislative Assembly-a la pharh leh tur a ni. Report hi bung 11-a then niin phek 549-a chhah a ni.
15th Union Finance Commission atanga tualchhung sawrkar – village councils leh municipalities te tanpuina sum “local body grants†lo kal thin te hi Legislative Assembly ah March 31, 2024 hma a State Finance Commission report bawhzuina te pharh anih loh chuan dawn zui theih ani dawn tawh lo a ni.
State Finance Commission report hi pawm a nih hun chuan tualchhung sawrkarten state sawrkar atanga kumtina an sum dawn dan tur hria in, tualchhung inrelbawlna mumal zawkin an kalpui thei dawn a ni.
Finance Commission report thehlut
