2023- 2024 sawrkar kum tawp ni ah sum tih lapse awm loin, tluang takin sawrkar kumtawp hi khar a ni tih ZPM chuan an sawi.
ZPM Gen. Hqrs. thuchhuak chuan, 2023- 2024 financial year tawp ni – March 31 khan tluang taka zawhfel a ni a, a kharna hi finance changtu chief minister Pu Lalduhoma chuan uapin, a ni uapna hnuaia sum lapse awm miah loa tluang taka financial year tawp khar a ni chu lawmawm an thu a sawi. ‘Finance minister leh thawktute inpekna a ropui kan tiin, kan chhuang a ni,’ a ti.
Sawrkar kalphungah, kumtin financial ending hi March 31 zanlai dar 12.00 thleng a nih avangin, Reserve Bank of India-in sawrkar transaction khawih agency bank-te thlengin hemi nia office kai vek turin a hriattir thin a. Treasury-a thawkte pawhin office an kai a ngai a, RBI-in zan dar 11.00 ah server an off dawn avangin chumi hmaa thil tul inchinfel hman a ngai tih ZPM chuan an sawi.
‘Kumin financial ending hi Pathianni (Easter Sunday) ah a tlak avangin department dangte office kai loin, Treasury office-a thawkte chauh kal tura tih an ni a. Finance changtu, chief minister Pu Lalduhoma chuan a mawhphurhna a nih angin chawhma inkhawm banah Aizawl North leh South Treasury a tlawh a, pa chan changa thawktute hnathawh a hmawr a bawkpui hi kan chhuang hle a ni,’ a ti.
Chutih laiin party pakhatin thuchhuah meuh siamin, finance changtu chief minister chu a department enkawl danah Pathianni bawhchhia ang hiala sakhuana hmanga mipui rilru a dik lo zawnga kawih her a tum chu awm lo an tiin, sawrkar khalhngil tumna lam aiin politics-a inchirh thehna leh chief minister sawisel tumna hrim hrim a ang hle tih a sawi. Mihring khawsak phung leh sawrkar kalphungah pawh tul bik thil leh loh theih loh thil a awm thin a, hemi remchanga la a, mipui rilru, sakhuana hmanga a dik lo zawnga kawihher tumna chu thleng tawh lo se an ti hle tih a sawi a ni.
Financial year tawp ni ah sum lapse a awm lo – ZPM
