Finnish conservative leader Petteri Orpo chuan inthlanpui neihah Prime Minister Sanna Marin party centre left te chu hnehin thuneihna a chang dawn ta.
“Sorkar kan siam dawn ta a ni,” tiin National Coaltion Party leader chuan a sawi a. Orpo hian vote 20.8% hmuin right-wing populist Finns Party leh centre left te aiin vote a hmu sang a ni.
Populist te hian record 20.1% hmuin Marin leh a party 19.9% vote hmute tan chuan na tak tur a ni bawk a.
Marin hi poll rating-ah sang tak ni rengin Nato-a Finland luh theih nana a hmalaknaah fak em em niin Covid-19 pandemic a hmachhawn danah pawh fak hlawh a ni.
Conservative tena chakna an chan thu an sawi hnuah centre-left leader chuan an chak loh thu puang nghalin, “Inthlana chak zawkte kan lawmpui a, National Coaltion Party te kan lawmpui a ni, Finns party te kan lawmpui a. Democracy in aw a chhuah a ni,” tiin Marin chuan a sawi.
Inthlan hmain party pathumte chu hnaih taka inbichilh rengin poll lakah an awm a, result a chhuahah meuh pawh an inhnaih thial thial hle.
Finland PM ni mek Sanna Marin hi kum 37 chauha upa niin kum 2019-a prime minister a nih khan khawvel leader naupang ber niin a lar phah hle a ni.
Ukraine-in Russia a runah Finland a kaihhruai danah fak a hlawh em em laiin inthlan erawh Finland economy behchhana inbeihna a ni tlat bawk si a ni. Nikum khan party neihnaah a lam lai leh a zu in lai video thehdarh chiam a ni bawk a, chu chuan a hmel a tibal bawk.
A elpui ber Petteri Orpo erawh in Sanna Marin in ‘rock-star’ quality a neih ang engmah a nei lo thung a. “Career politician a ni a, kum 1990 atanga politics luhchilh tawh niin cool dap mai leh nghet tak a ni thung. Amah sawiselna pawh ngawi chuar chuar lutuk tih a ni a, mahse, chu tak chu Finland mipui ten an ngaihzawn a ni tho,” tiin Matti Koivisto, political correspondent chuan a sawi.
Conservative te chuan sorkar siam turin hun tha nei dawnin kum 53 a upa Orpo chu prime minister thar a nih ngei rin a ni a. Orpo kaihhruaina hnuaiah pro-European tho tur niin economic policy erawh ngaih pawimawh berah an dah ang. Pa huhang nei lem lo tak nia ngaih niin moderate tak a ni tiin Vares, professor of contemporary, University of Turku chuan sawiin, “Makpa atana him leh duhthusam ang tur a ni,” tiin a sawi.
Finland system-ah chuan parliament-a seat 200 awmah sorkar tur chuan seat 100 chuang neih a ngai a, chu chu thil awlsam tak a ni lo. Orpo hian duhthlan tur pahnih a nei a, Riikka Purra’s nationalist Finns Party te nena coalition siam emaw Sanna Marin party Social Democrats te nena inremna siam a ni tia sawi a ni.
“Finns ho hi thawhpui harsa tak an nia a chhan chu tawnhriat an nei tlem a, an MP te hi kawng engkima inhal emaw tihmai tur te an ni” tiin Prof Vares chuan a sawi bawk a. “Hei vang hian Orpo tan chuan Sanna Marin party Social Democrats te nena thawhho chu thlanawm ber tur a ni a, mahse, Marin chuan conservative te a tei thei bau si lo,” a ti bawk.
Finland-ah Sanna Marin hnawl
![](https://theaizawlpost.org/wp-content/uploads/2023/04/fin.jpg)