MLA tum khat nihna chauh Bhajan Lal Sharma chu Rajasthan Chief Minister atan rinawmna thu tiamtira lakluh a ni ta a. Lakluh inkhawmah hian Prime Minister Narendra Modi mai bakah BJP top leader te chuan an telpui a ni.
Sharma hi BJP state general secretary niin kum 57 mi a nihin Chief Minister a ni zui ta a ni.
Diya Kumari leh Prem Chand Bairwa te chu Deputy Chief Ministers atan Governor Kalraj Mishra chuan a la lut bawk a, an pathum hian Hindi vekin rinawmna thu an tiam a ni.
Chief Minister kalchhuak Ashok Gehlot pawhin lawmluhna inkhawm hi tel puiin Albert Hall-ah lakluh inkhawm neih a ni a. BJP MLA leh workers rualte an pungkhawm hnem hle.
Sharma hi Rashtriya Swayamsevak Sangh leader te thlawp niin December 12 khan BJP lagislature party leader a thlan a ni tawh bawk.
Lakluh inkhawmah PM Modi, BJP president J.P. Nadda, Union Home Minister Amit Shah, Defence Minister Rajnath Singh, Union Transport Minister Nitin Gadkari, Jal Shakti Minister Gajendra Singh Shekhawat leh senior party leader dang te pawhin an telpui a.
Chief Minister of Madhya Pradesh Mohan Yadav, Uttarakhand CM Pushkar Dhami, Gujarat CM Bhupendrabhai Patel, Maharashtra CM Eknath Shinde, Goa CM Pramod Sawant leh Deputy Chief Minister of Uttar Pradesh Keshav Prasad Maurya te pawhn an telpui bawk a. Anni bakah hian Hindu puithiam ten an telpui bawk.
Sharma, Kumari leh Bairwa tena thutiam an lak lai hian BJP supporter te chuan ‘Jai Shri Ram’ tih leh ‘Modi-Modi’ ti tein an lo au a ni.
Ashok Gehlot chu hruaitu zinga a hmun thleng hmasa pawl niin Gajendra Singh Shekhawat bulah a thu a. Gehlot hian a hmain Union Minister Shekhawat chu Sanjivani Credit Co-operative Society scam a inhnamhnawih tiin a lo puh tawh a. Shekhawat chuan Delhi-ah Gehlot lakah defamation case a file thung.
Mi rin loh
December 12-a BJP tena MLA tum khat nihna Bhajan Lal Sharma Chief Minister atana an thlan khan mak tih a hlawh hle a, chutih rualin tu nge chief minister ni dawn tia inrinsiakna chu dah thatin a awm zui a ni.
BJP MLA rual inhmukhawm te chuan Sanganer legislator hi legislature party leader atan an thlang a.
Chief Minister ni thei ber tura a hmaa sawi lawk te chu Gajendra Singh Sekhawat leh Vasundhara Raje te niin an pahnihah a tu emaw zawk zawk an chief minister rin a ni.
Sharma hi Brahmin niin BJP tena Brahmin te hip nana an thehchhuah ber niin Bharatpur district chhuak niin Jaipur a Sanganer constitutency atangin a elpui 48,081 vote laia hnehin thlan tlin a ni a. Political Science-ah master degree a nei bawk.
Tun hnai inthlanah State pathumah BJP te chuan party hruaitu zingah pawha hriat lar lutuk loh thah chief minister atan an thlang chhuak a. VIshnu Deo Sai chu Chhattisgarh chief minister atana thlan a ni a, Mohan Yadav pawh Madhya Pradesh chief minister atana thlan a ni bawk.
November 25 Rajasthan inthlanah khan BJP te chuan seat 115 an la a, Congress ten seat 69 an la thung a. Assembly seat 200 awmah 199 ah inthlanna neih a ni.
Hruaitu lawkah tla na
Rashtriya Swayamsevak Sangh leh BJP worker tawng tam lo leh mahni invawng tha tia hriat lar a ni a, chutak chu party hotu tena an duh a ni. BJT state headquarter ah pawh party president nihna Ashok Parnami, Madan Lal Saini, Satish Poonia leh CP Joshi tena an innih chhawk pawhin Sharma chu a khawiah pawh pawimawhna nei vekin a awm tih a ni bawk.
BJP national president JP Nadda nena inhnimhnai tak niin chumai bakah Union Home Minister Amit Shah chu West Bengal assembly inthlana a campaign lai khan a puibawmtu ber niin Amit Shah chuan khata tang khan a duh zual tia sawi a ni bawk.
Hardcore RSS a ni bawk a, kum 1992 a Babri mosque chhutchhiatah pawh khan inhnamhnawihin lung in a tang nghe nghe a ni. Khatih lai vel khan politics a luhchilh tan hunna ni bawk a. Kum 27 atangin village sarpanch tum hnih a ni hman bawk a.
Kum 30 chhung velin Sharma chuan party organisation Bharatiya Janata Yuva Morcha (BJYM) ah nihna hrang hrang a chelh bawk a. School an kal lai atangin RSS-affiliate Akhil Bharatiya Vidhyarthi Parishad (ABVP) zawm tawh niin kum 1990 a ABVP tena Jammu atanga Srinagar kawngzawhna an neihah pawh khan a tel bawk.