Site icon The Aizawl Post

Fist-bump record siam

Guinness World Record siam lama hmingthang, David Rush chuan record a siam belh leh ta a, tun tuma a record siam chu second 30 chhunga fist-bump hnem ber record a ni. Fist-bump chu kuttum hmanga inchibai ti mai la, kut an humruh ve ve a, chu chu an insik tir thin. Hmanhmawh taka kuttum inchibai chu duh aia inchibai nat a awl deuh a niang, David Rush chuan, “Kan pilh pheng phung mai alawm,” a ti.

David Rush hi an thenawm ta fapa Joey-a’n a record siamah hian a tawiawm a, an pahnih hian inhmachhawna dingin, an kuttum an inhnek tlir char char mai a ni. Chutia second 30 rang theih-pa-ling-kawha an han in-fist-bump char char chuan, second 30 chhungin vawi 273 an in-fist-bump hman a, nikum April thlaa Nafees Istay Taufiq Antu leh Akibur Rahman Saikat ten second 30 chhunga vawi 174 in-fist-bump a record an siam chu an rawn khum ta a ni.
David Rush chuan a tak takah chuan vawi 297 an in-fist-bump hman niin a sawi a, mahse, Guinness guidelines atangin vawi 24 chu an pawm sak thei lo va, vawi 273-ah an pawm sak ta a ni.

David Rush hi minute khat chhunga fist-bump tihnem ber record pawh lo siam tawh tho a ni a, mahse, second 30 chhunga record siam chu a hautak fe zawk niin a sawi a, “A technical-in a mi cho a na daih zawk. second khatah vawi nga vel zel hnunglam leh hmazawng a kuttum tih chet takah chuan han tihsual deuh nawk nawk pawh a awm lo thei lo a ni,” a ti. Rush hian nikum March thla khan minute khat chhunga mi chi hrang hrang fist-bump tihnem ber record siamin, mi 152 a fist-bump hman a, hetah hi chuan mipakhat nen chauh in-fist-bump lovin, mi hrang hrang an tel thung.

David Rush hian Guinness World Record hi 250 a siam tawh a, mahse, Guinness World Record siam hnem ber erawh a la nipha chuang lo, tunah Guinness World Record siam hnem ber record siamtu chu Ashrita Furman a ni a, 1979 atanga record siam tan tawh kha niin, record 700 chuang a siam tawh a ni

Exit mobile version