Mizoram Police tana ‘fitness programme’ an ruahman pawhin a a kaihthawh zawh loh khawpa hna thawk thei lo police chu, sawrkarin a hnuaia thawk zinga thawk tha thei lo te chunga hma lak a tum angin, a hun hmaa inchawlh tir a ngai thei tih Home minister K Sapdanga chuan a sawi. Mizoram Police Sports Meet vawi 22-na chu Zirtawpni khan 1st Bn. MAP Ground Armed Vengah khar a ni a. Hmanpuitu Home minister chuan, ram leh hnam hmelma ruihtheihthil hluar zel tur danna atan tha thlah loin Mizoram Police chuan hma a la zel tih a sawi a. Ram leh mipui him zawkna atana an thawh that chungah lawmthu a sawi.
Taksa insawizawina lama intuaithar leh police-ten taksa hrisel an neih theihna atan kumin August 5 atang khan ‘45 Minutes for All Ranks of Mizoram Police’ tih an tan a, Mizoram Police-te taksa fitness-ah leh discipline vawn kawngah hma a tihsawn zel an beisei tih a sawi.
Kumin August 21-a DP&AR-in sawrkar hnathawkte hna thawh that leh that loh enna, Periodical Review neih dan tur inkaihhruaina – office memorundum a chhuah tawh angin, police-te pawh an fitness programme-in a kaihthawh zawh loh khawpa hna thawk thei lo an awm chuan a hun hmaa chawlh tir (premature retirement) thleng pawhin hma an la dawn tih K Sapdanga hian a sawi.
Halpuah leh halmawi khapna khauh taka kenkawh a nih tur thu sawiin, a bikin sawrkar hnathawkte chu he thupek hi bawhchhe lo turin a chah tih a sawi bawk.
Police Sports Meet-ah hian contingent 12-ah inthenin, infiammi sang chuang sports discipline 18-ah an inel a. PHQ (PHQ, Security, CID SB & Crime, Cyber Crime, Special Narcotics, Lok Ayukta, Sports Department, MSSC & Secretariat) chu overall champion a ni a, Central Range (Aizawl, Saitual DEF & Traffic) chu pahnihna niin, Red Group (MPRO, F&ES, ACB, FSL & DM&R) chu pathumna a ni.
Fitness programme kaihthawh zawh loh police an chawlh mai a ngai ang – Home minister
