Daily Newspaper

FLAG VAR ZAR LEH A BEHBAWM

1,023

H. Vanlalhuma
Mission Veng

Tunlai hian Capt. Lalthlana Sailo lehkhabu ziah ‘Vangvat Kai Lai Nite’ avângin thenkhatin kan lo theihnghilh then tawh, ‘Flag var zar rawt’ chungchang a lar hle mai. Hei hi tunhnaia Lalnuntawma Fanaiin Capt. Lalthlana Sailo TV-a a interview atanga rawn lar thar hluai a ni a, thil thar emaw ti, zir chianna nei lem lo tih hriat takten Capt. Lalthlana Sailo lehkhabu an han chip zuina thuziak chhiar tûr a tam a, belhchian erawh a dâwl lem lo. He thil thlen hun hi ni hnih chhûng lek a ni a, chu chu tunah hian kan sawi ve dawn a, a behbawm tlêm kan hrût tel hlek bawk ang.

1. Flag var zar rawt vawi 1-na (16.12.1971):
Hei hi India laka Pakistan tlâwm ni kha niin khawvêl Radio hrang hrangin Pakistan a tlâwm thu hi tlai dar 5:00 velah an puang. Radio-in Pakistan tlawm thu a puan hma pawh hian MNF rammu ho khan Pakistan an tlawm dawn hnai tih rinna an nei daih tawh a. Chuvang chuan tlai dar 3:00 ah Pu Denga hovin an awm zêl dân tûr relin Rangamati khaw chhûnga Pu Denga chênna in Wabda Rest House-ah Cabinet Member, Senator, MP, Secretary lian ho, Party OB, DC ho, Chief Administrator, Capital Commissioner, EAF hotu leh sipai lamah hotu lian zawng zawngte (A Dumpawl tia an puh, Jail-a an khung mek te tel lovin) inhmukhawmin ro an rêl a.

Chuta kalkhawm mi tam ber chuan Pakistan sipaite an tlâwm tawh sa nia an hmuh laiin Pu Denga kha chuan an tlâwm mai a la ring phal lova, awm dân tûr ber pawh hre lovin an buai tlang hle. Tlai dar 5 ah Pakistan Gen. Niazi-a’n Radio-ah an tlâwm thu a rawn puang ta nge nge a, chutah pawh chuan, “West Pakistan lam an la tlawm hlei nem,” la ti fan pawl an awm a, zan dar 8:00 ah Pakistan President Gen. Yahya Khan-a’n Radio-ah thu a sawi dawn tih an hriat avangin chu chu la nghah phawt ni se an ti.

Hemi hnu hret hian Rangamati-a Pakistan sipai hotu ber Lt. Col. Zaidis Khan-a @ Alam-a hnênah Laldenga leh Malsawma Colney an va kal a. Alam-a chuan Chittagong-a India sipaite kutah inpe turin chumi zan ngeia an kal tûr thu a lo hrilh ta a. Pu Denga’n Alam-a hnenah chuan, amah leh a chhungte chu an thlazar hnuaia hruai ve turin a ngen a, mahse Alam-a hian a remti lo. A hnu deuhah Alam-a hnên atang bawk hian kohna an dawng leh a, chumi tum chuan Pu Denga leh Malsawma Colney bakah Minister Ngurkunga leh Pu Denga Secretary Pu Zoramthanga te pawh hruai tel ve an ni a. Pu Denga pawhin a thil dil ngai bawk a dil nawn leh a, mahse Alama chuan, “I kal vena chi a ni lo. India sipai kutah kan lût dawn a ni a, kan thi ang nge pawh hriat a ni lo. In duh chuan hei silai leh a mu tam tak kan la nei a, hawn rawh u. Pawisa erawh chu kan nei tam vak lo a, hawn tel bawk rawh u” tiin a chhang a. Rs. 70,000 lo hlanin an hawpui leh ta a ni.

Pu Denga meuh pawh a mangang hle a niang a pindanah a tawm bo daih a, a hote mangang lah chu thut pawh thu nghet thei lovin common room-ah an vir sek mai a. Chutih lai chuan an Capital vêngtu sipai post hnai ber Subalong-a duty te pawh an in withdraw tawh a, India sipai ten an hmun ruak an rawn luah zel bawk si a, an mangang tlang hle. Zan dar 9 velah chuan Rangamati chhuahsan ngei chu an rêl thei ta a. Mahse chhuahsan dân tûr leh khawi lam nge an pan ang tih thuah an buai zui leh ta a.

Pu Vanhela chuan, “Chair atangin a hotupa ber chuan 7th Fleet beiseia Chittagong pan kha a han rawt phawt a, kan pui lova; Chittagong-ah in mantir ang tihna mai niin kan hria a. Ani chu a ding leh a, a nih leh a thei thei Mizoram lam luiralah hleuh kai i ti mai ang u hmiang, a han ti a. Hlauhawm hmuna nunau leh damlo tlanchhiatsan chu tih chiah kan ngai si lova. Tah hian Laldenga chuan kan aiin Vai a hlau ta emaw tih turin Vai kuta luh a hrehzia a tilang ta a. ‘A, keini chhung hi chu India kutah hi chuan him lo zual tur kan ni bik a. Hotute hian min hrethiam ula, kan chhûng hian kan vah vahnaah kan vak bo mai ang chu’ a ti chhuak ta ngawt mai a. Mahse mak tihna leh awm lo tihna a ri hak a. A tel lovin kan thlabar turzia kan hre nghal vek a ni awm e. Kan fahrah zual lai a ni a; kan Vice President leh Cabinet 5 zinga 4 te chu Lung Inah kan khung bo vek lai a ni si a. Kan sawi rei tulh tulh a, kan mangang tulh tulh a […] Zan a rei tulh tulh a, duhthlan tur tha kan nei thei ngang lo a ni,” a ti.

Hetih lai hian India hnena inpek te pawh sawi rik a lo ni ta niin a lang a. Pu Biakchhunga chuan, “Chutia mangang taka an awm lai chuan Pu Denga awmna pindan atangin a Private Secretary Zoramthanga chu lo chhuakin India sipai post hnai ber nia an ngaih Subalong-ah Flag var zar a India sipaite lo han biak chu a rawt a. Pu Denga Secretary mai a ni a, ama thu chhuak chuan a rawt an ring bawk si lova, mak ti takin an inen kual hlawm a…,” tiin a ziak a ni.

Pu Vanhela bawk chuan, “Kan hotupa chu a rawn ding chhuak leh ta a. Chutiang a nih bawk si chuan a nih leh, hmelma sipai post hnai ber Lungkudu-ah khian Flag var zarin kan lut chho mai dawn emaw chu ni ang, a han ti ve leh ta a. Chu veleh, ‘A tha ber ang,’ tih leh ‘I lut mai ang u,’ tih te, ‘Ni mai rawh se’ tih rite chu a thum ta mar mar a. Kan vai zawm chu a ni ta mai a, tumah hnial kan awm lo. Zep nak emaw, kan inpe fai ta vek a nih chu…Chhuah dân kan rel ta a. Lawng 4 chauh kan nei a, kan leng dawn lo tlat mai. Zawn belh mêk zêl chu a la ni a. Chutih laiin rawtna dang a lo awm ta a, ‘Lungkudu atang hi chuan Mizoram a hla lutuk a, kalkawngah India sipaiten min tiduhdah lutuk hman dawn a, chu ai chuan Maini lui dung zawh chho ila, a hnara awm Dagger Bridage zawm chho ila, Mizoram ri bul, Tuipuibari Out-Post hnai berah in surrender zawk ila a tha ang’ tiin. Chu chu tha kan ti tlang leh thuai a. Tripura lam hawi hreta Maini luidung zawh dân chu kan rêl leh nghal mawlh mawlh a,” tiin a ziak. An zavaia lenna tûr lawng an hmuh leh theih tak loah chuan an mangang leh ta hle a, an tawngtai rual ta ringawt mai a. “Hemi tum phei hi chuan kan thinlung zawng zawngin kan Pathian, Mizote Pathian hi kan au tak meuh meuh a niin ka hria. A then kan thingthi a, a then chhuat bihin kan kun a, a then chung lamah ban pahnih phar chhovin kan au a ni. Kan tawngtai ri chu khuai rau thlawk ri ang mur mur a ni,” tiin Pu Vanhela hian a ziak chhunzawm bawk.

An tawngtai vawi 2-naah chuan lui mawng lam atanga Speed Boat lo tlan thawm an hria a, hmelma lam an ni ang tih an hlau hle. Mahse Pakistan sipai Maj. Dixit-a te lo niin Chittagong pan tûr an nih thu leh anmahni thlahna chibai buk tûra rawn kal an nih thu an hrilh ta a. Tin, an lo kalna lam, Pharwa lui hmun pakhatah Mukti Bahini leh India sipai Company khat vel an awm thu an hrilh nghal a. An kal hnuah ngaihtuahna thar an nei leh ta a, sipai hotu lam ngaih dân an zâwt a, Army Chief Thangzuala Sailo a dam loh avângin Pu Biakchhunga’n Arakan lam pan a rawt a, hmelma sipai pawh an tawn tlang mai tûr thute sawin, Pu Biakchhunga chuan, “Tunah hian keini ho hian Flag var zara India sipaiho hnêna inpek lo rel thlu tehreng pawh ni ila, kan sipai tam zawk front line-ah India sipai nen an inkap mek a, chungte chu an inpe mai dawn si lo va. Chu chang a ni lo, helai hmuna awm Army Headquarters-a sipaiho pawh hi kan thunun theih a rinawm bawk hek lo. Chuvangin kal chhuah nghal mai dân tûr kan ngaihtuah hi a finthlak ber a rinawm a, thil hmanhmawh thlak a nih avangin rawtna ka’n siam nghal ang e. Lawng awm thei ang ang hi man khawm ila, Rangamati hi zanin ngeiah i chhuahsan ang u,” a ti a, Col. Lallawta’n a rawn thlawp a, tha an ti tlang a. Chutiang tur chuan sipai leh Civil lam pawh an tin darh ta a. Troop Commander atan Pu Biakchhunga hi an ruat nghal bawk.

Lt. Col. Lunghnema, Lt. Lalchamliana (tuna kan Home Minister), Lt. Zaidarhzauva leh mi eng emaw zat thir lawng hmangin HMG nen hmahruaiin an kal a, a hnuah Capt. Lalthlana Sailo ten hmahruai ho hi an fin veleh a. Pakistan Army ten Rangamati an chhuahsan fel, zanlai pelah lawng 5/6 velah an lût khawm a, Rangamati an chhuahsan fel hi a tuk (17.12.1971) zing dar 2 dawn a ni tawh a, hemi tuma tlan chhuak, lawnga chuang hi mi 1400-1500 vel nia hriat a ni.

Hemi ni, Flag var zar rawt tum khatna kan tih mai (16.12.1971) hi han khaikhawm dawn ila:-

(1) Pakistan an tlâwm avângin MNF an buai hle a, an sahimna atan thil hrang hrang ngaihtuahin an thukhawm.

(2) Ngaih dân tha tak an neih mai theih loh avângin an mangang hle a, Flag Var Zara in surrender mai an rawt a, a tlang teuh hle.

(3) Flag var zar rawttu, a sawi chhuaktu hi Pu Zoramthanga a ni. Ani hi Pu Denga Secretary mai a nih avangin ama thua rawtna siam a nih a rinawm loh a, a rawttu tak zawk chu Pu Laldenga niin Pu Zoramthanga hnenah hian Flag var zar va rawt mai teh, a ti a nih a rinawm.
(4) Pu Biakchhunga’n lawng zawn khawm a, Rangamati chhuahsan a, Arakan lam pan a rawt a. Chu rawtna chu pawm niin lawngin an tawlh chhuak.

2. Flag var zar rawt vawi 2-na (17.12.1971):
Kaptai tuikhuah, Rangamati atanga hla vak lo an kal lai hian chhum a zin nasat avangin an kal chak thei lova, an rih bawk avangin an bungrua tam tak an paih then a, lawng pawh a pangngaiin a kal leh thei ta a. Tatkawng lui hnar lam pana an inzui chhoh zel lai chuan Belaichari khaw bul an thlenin India Helicopter chu hniam takah an rawn thlawk a, hei hi zing dar 8 vel a ni.

Hetih lai hian President Laldenga chhungkaw zingah Capt. Lalhleia a tel tawh a, ‘Mi Huaisen Capt. Lalhleia Chanchin’ tih lehkhabu ziaktu C. Zama chuan, “Helicopter ri an han hriat veleh khan lawng chung zawla thute chu lawng chhûngah an lût nghal vat a. Helicopter chuan tute nge chuang tih hriat tum niawm takin lawng chungah a bir hnai a. Mi thenkhat mangang chuan puan var zar an rawt hman a. Capt. Lalhleia’n, ‘Puanvar zar a hun lo, puan var zar rawt in awm leh chuan keiman ka bitum ang che u,” tiin a chhang a, tuman an sawi ri ngam ta lova,” tiin a ziak a. Tin, tun hnaia chhuak ‘Vangvat kai lai nite’ tih lehkhabu Capt. Lalthlana Sailo ziakah hei aia chiang deuh hlekin tarlan a ni ve leh ta bawk.

A nawlpui Rangamati atanga an chhuah lai khan Capt. Lalthlana hi a tel ve lova, lawng an zawn khawm lai vel erawh kha chuan a tel. Kal tura an inthiar vel lai khan thliarkar te reuh têa duty-a awm Pu Zamana ho mi 7/8 lek kalsan a theih loh avangin han hruai turin Pu Biakchhunga khan a tir a, Rangamati an thlen leh chuan ni a chhuak siar siar tawh a, a nawlpui pawhin thui tak an thleng tawh a, an umzui ta a, Helicopter rawn thlawk tia kan sawi rawn thlawh hma hian an han umphak leh ta a ni.

Capt. Lalthlana Sailo lehkhabu ziah han chip zuina thuziak thenkhatah thil hriat tam tawk loh avânga han ziah pawlh deuh nawk nawk hmuh tur a tam hle a. A bikin Pu Vanhela thuziaka flag var zar rawt chungchang rawn tuihnih tute ziah thenkhat hi chu Rangamati chhuahsana lawnga an chuan hma thil, Flag var zar vawi 1-na kan tih kha a ni. Khatih lai kha chuan lawngah an la chuang lova, an chuanna tur lawng pawh an la zawng khawm lova, khawmualah ro an la rêl mêk chauh a ni.

A chunga kan tarlan tawh angin flag var zar rawt vawi 2-na chungchang hi C. Zama ziak lehkhabu pakhatah a chuanna a rei tawh a. Capt. Lalthlana Sailo hian MNF Gen. Hqrs. in kum 2017-a an tih chhuah lehkhabu kawm pawl, bu chhah zet maiah khan tuna a ziah ang tho hian a lo ziak tawh a, Capt. Lalhleia’n Pu Zoramthanga kah a tum tih lai tak erawh hi chu a lang tel lo thung. Hetah pawh hian ziak telin lehkhabu buaipuitu ten an paih then sak nge tih chu amah Capt. Lalthlana leh lehkhabu buaipuitute zawh fiah mai chi a ni awm e.

Flag var zar rawt vawi 2-na chungchang bik chu hetiang hian khaikhawm dawn ila:-
(1) Lawng 6/7 velah mi 200-300 vel zel chuangin 17.12.1971 zing dar 2 velah Rangamati an chhuahsan a, an rit hle.

(2) Belaichari khaw bul an thlen lai velin an chung zawn hnai takah India Helicopter a rawn thlawk.

(3) Flag var zar rawt an awm leh a, Capt. Lalhleia’n, “Rawt in awm leh chuan keiman ka bitum ang che u,” a ti, tiin flag zar rawttu hming tarlang lovin C. Zama’n a ziak.

(4) Pu Zoramthanga’n flag var zar a rawt leh, tiin kum 2017-a chhuak lehkhabu pakhatah Capt. Lalthlana’n a ziak. He thuziak chungchangah sawi leh i a awm zui lo.

(5) Capt. Lalhleia’n kah a tum, tiin hming hmerhin Capt. Lalthlana’n a lehkhabuah a ziak lang ta.

(6) Lawnga flag var zar rawt lehtu hi Pu Zoramthanga bawk a ni a, an bul hnaia awm Capt. Lalhleia’n chu chu remti lovin a rawttu chawpa kahah a vau. He thu hi Nirmal Nibodan’an Dagger Brigade-ah pawh a lo ziak daih tawh bawk a.

(7) Pu Zoramthanga hi Laldenga te nen lawng pakhata chuang vek an nih a rinawm avangin leh rammu sorkarah nihna pawimawh chelh a nei lova, an hotu a nih ve loh avangin ama irawm chhuak a nih a rinawm loh a. Flag var zar rawttu tak pawh hi Pu Denga tho a nih leh a rinawm.

3. A dam laiin tuman Pu Laldenga an bei ngam lova, chhang lettu tur a awm tawh loh hnuah chauh an bei ngam:

Rambuai hma atanga Pu Laldenga Cabinet Minister ni tawh zinga Minister ni rei ber, Calcutta Convention hnu lawka Pu Denga’n a ban tak Pu Ngurkunga khan a hming chawiin lehkhabu pakhat, ‘Political Diary of Ngurkunga’ tih a chhuah a, chu chu kum 1988 ah niin Pu Laldenga pawh a la dam. Kha kha Pu Laldenga beihna inziak tel lehkhabu, a mi leh sa hluite ziah chhuak hmasa ber a ni awm e. Pu Laldenga’n a ban chungchangah pawh a ngaih dân a nih loh thu leh Zalênna Movement kha Laldenga private property a nih loh thu te pawh mi dang (Pu Daniel-a) hnêna lehkha a thawnah (Dt. 22.10.1977) a ziak tel nghe nghe.

Remna ziah (1986) leh Pu Laldenga thih kum inkar rei lotêah khan rambuai review-na atan hun thawl tha a la awm lo tih kan hre tlang awm e. Remna awm tawh mah se rambuai rim kha a la nam phak kan ti thei ang. Khang hun laia a nawlpui ngaihsan pawh inkah tek tek, lasi zawl thawnthu, Black belt Zoramchhana zawng hur kick hlumtu leh cowboy lam rawngkai deuh vek a ni a, chik zawka rambuai zu zir chianna te, rammu hluite atang ngei pawhin chik zawka zu thlir lêtna hun thawl tha kha a la awm lo a ni. Politics a chiri a, MNF Party ngei pawh Pu Denga hovin la awm mah se an insawh nghet hman lova, inthlanpui an hmachhawn mawlh mawlh lai a nih bawk kha.

Kum 1986-a chhuak Pu Vanhela lehkhabua thuziak tlemte kan han tarlan tak atang hian Pu Laldenga thlavang hauh a tumna lamah Laldenga beih zui theihna tur thil tam tak a ziak tel a ni tih kan hmu ang a. Zep thu a cheng lo, ani phei hi chu Pro Laldenga niin, “Khawvêla mihring piang tawh zawng zawng zingah Pu Laldenga a ropui ber,” titu a ni tih kan hriat tel a tha awm e. Pu Vanhela hian 16.2.1987 ah Dawrpui Sikulah Mizo National Union te, PC te leh Congress thalai ten mipui hmaah Pu Laldenga kha nuihza siam nan an in hman chhawk nilen thu pawh a ziak tel a. Sakeibaknei chanchinbu October 1-6, 1986 chhuakah MNF MP thin, T. Rosanga, Khuangthing khuain Pu Laldenga kha, “Nang, hnam damna hi Independent-ah hian a awm lo tia i tannaah hian i tang ang a. Independent-ah hian hnam damna a awm, tiin ka tang thung ang,” tiin inhnial puiah a cho thu a chuang a. Hei hian Pu Laldenga kha a dam lai ngei pawhin bei ngamtu an awm tih a tichiang awm e.

Tlangkawmna:
Thenkhat tana thumu hnu, sawi chhuah leh thin pawh ngai tawh lo hi ‘thenkhat’ chuan kan la sawi dawn t©an chauh niin a lang. Thu hlui phawrh chhuah leh hnuhnawh remti vak lo tan chuan lehkhabu chhiar huphurhawm tak a la rawn chhuak fo ngeiin a rinawm a ni. Thil thleng thuhmun ziah dân chungchangah mi pakhatin a ziah lan ve kher loh avang khan kha thil kha a thleng lo tihna a ni lova, a ziak hnuhnungin chipchiar zawka a rawn ziah kha a dik vek bik e tihna pawh a ni hek lo. Mi tam takin thil thuhmun an tawn ho dân an ziah hi zaah za inang diak diak beisei chi a ni lo tih kan hriat a tha bawk ang.

Tum hnih lai Flag var zar rawt a nih thu leh a sawi chhuaktu a nih avangin Pu Zoramthanga hi kan dem ngawt tûr pawh a ni lo a. Khatih lai khan nihna pawimawh pawh a la chelh lo a, President Laldenga Secretary mai a nih avangin Pu Laldenga khan tawtawrawt atan a hmang mai mai pawh a ni thei a. Flag var zar rawt chungchangah hian dem tur kan zawng dawn a nih chuan a phena awm Pu Laldenga kha a demawm ber maithei. Eng pawh ni se, a dik zawk chu zawn a, chhui a, hriat hi thangtharte mawhphurhna, kan tih makmawh leh kan chanvo liau liau a ni.

Source:
1. Rambuai Literature (2014), C. Lalawmpuia Vanchiau.
2. Zofate Zinkawngah Zalenna mei a mit tur a ni lo (2007), R. Zamawia.
3. Hnam Kalsiam (1996), Biakchhunga.
4. Mi Huaisen Capt. Lalhleia Chanchin, C. Zama
5. Documentary of Mizoram War of Independence (2017), MNF Gen. Hqrs.
6. Political Diary of Ngurkunga (1988), Zokhumi.
7. World Bank Kawng leh Keimah (2011), K. Lalsawmvela
8. Dagger Brgade (1980), Nirmal Nibedan.

Get real time updates directly on you device, subscribe now.

1 Comment
  1. Rosanga says

    Dingdi cahnchinbu editor in a kawmnnaah khan “Nui chungin fiamthuin ka rawt” a tih leh tawh kha. An mangan tehlul nen fiamthu hi a duh hek hek a nia😜

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy