FMR-ah Mizo mipui tana
tha ber ngaihtuah a ni ang
– Nityanand Rai
Free Movement Regime chungchangah ram himna atana tha tur thlir tel chungin Mizoram leh Mizo mipui tana tha ber ngaihtuah a ni dawn tih Union minister of state for Home Affairs Nityanand Rai chuan a sawi.
Zan khat riaka Mizoram tlawhtu Union MoS hian Thawhlehni tlaia Aizawla amah kawmtu thuthar thehdarhtute zawhna chhangin, Prime minister Modi leh Union Home minister Amit Shah ten mipui tana tha ber tur leh mipui rawn chungin, ram himna leh ram tana tha turin thutlukna an siam thin a, FMR-ah pawh Mizoram leh Mizo mipui tana tha ber turin ngaihtuahna an hmang dawn tih a sawi.
National Education Policy 2020 chu Hindi tawng vulh len leh chawisan tumna a ni loa, zirlaiten an pianpui tawng (mother tongue) a an zir theih chu a thil tum pawimawh tak pakhat a ni a, Hindi tawng chawisan tumna niloin ram chhunga tawng chi hrang hrang awm chawisanna atana duan a ni tih a sawi a ni.
India hmarchhak chu PM Modi-a’n a ngaipawimawh hle a, hma a sawn theihna atan kawng hrang hrangin hna thawh mek a ni tih Nityanand Rai hian a sawi bawk.
Raltlan chungchangah, mi tupawhin an chenna rama harsatna an tawk a nih chuan, India chuan kan mihring puite a ensan thei lo tih a sawi a ni.
Mara leh Chakma Autonomous District Council a tlawh chhan chu, Prime minister-in India hmarchhak state-a khaw kilkhawr ber tlawh tur a tih avanga tlawh a ni tih Union MoS for Home Affairs hian a sawi.
Nilainia Siaha district-a sawrkar official-te leh NGO te a kawmnaah Citizenship Amendment chu ram chhunga sakhaw dang vuantute nekchepna a ni loa, ram thenawm leh ram danga sakhuana avanga tihduhdah tuarte zalen taka an chen theihnan leh India ramah sakhaw hrang hrang vuantuten zalen taka an awm theihnana duan a ni, tiin a sawi a ni.
FMR-ah Mizo mipui tana tha ber ngaihtuah a ni ang – Nityanand Rai
