FOCUS project kalpui chhunzawm turin FIG hnenah hmanrua an hlan

FOCUS project kalpui chhunzawm
turin FIG hnenah hmanrua an hlan
FOCUS Project a tawp dawn tak avangin Ningani khan Serchhip-ah district bawrhsap Paul L Khuma hoin FOCUS Exit Strategy thutkhawm neih a ni a, loneitute hnenah FOCUS project kaltlanga hmasawnna ruhrel an din hrang hrang hlan a ni.
FOCUS project kalpui a nih chhunga Serchhip district-ah thingtlang lo neih bansan a, lo hmun nghet neia inlet ta loneitu engemawzat an awm chu he project hlawhtlinna pholangtu a ni tih a sawi.
FOCUS Project chuan loneitute tan hmasawnna ruhrel rotling engemawzat a hnutchhiah a, he project hi a tawp dawn tak avangin a enkawl zui chu a neitu dik tak loneitute kutah a awm tawh dawn, tiin, tan an lak chhunzawm a ngai dawn tih a sawi bawk.
“Economic Survey-a a lan danin, kum 2008- 2009 ah Mizorama agriculture leh a kaihhnawiha eizawngtuten State GDP za zelah 14 chauh an hauh phak laiin, 2022- 2023 ah chuan zaah 20.15 ah an inhlang kai a, hei hian sawrkar laipui leh state sawrkar hmalakna a hlawhchham lo tih a nemnghet,” Paul L Khuma hian a ti a. Chutihrualin hmasawnna tur tam tak kan la nei tih hria in, FOCUS hi tawp mah se, he project thiltum laipui ber a hlawhtlinna turin an thil zirchhuah, hmanrua leh bungrua an chhawmte tangkai taka hmang turin a fuih.
FOCUS deputy director (Agri) Lalhmingmuana chuan, FOCUS chhunzawmna turin ‘PROSPER’ tih hmingpu in Mizoram pum tuam thei tur project kalpui leh theih an inbeisei tih a sawi a ni.
Khaw hrang hranga loneitu intelkhawm, Farmers Interest Group (FIG) hnenah FOCUS hmanga hmasawnna ruhrel an din – immovable assets hlan a ni a. An hlan zingah hian check dam, water tank, agriculture link road, horticulture link road, farm link road, ran chaw siamna mini feed mill, nursery, lei (bridge), water harvesting structure leh a dangte a tel.
Serchhip district-a FOCUS hnathawh langsar zual:
# Khumtunga loneitu chhungkaw 80 chu balhla a huhoa chintirin thingtlang lo neih bansanin huan nghet neih tir an ni.
# District chhung khaw hrang hrangah leilet nei chhungkaw 126 leilet bial lian zawk siamsakin buh metric ton 147 an thar a. Leilet nei chhungkaw 64 chu leilet thar hlak laihsakin buh MT 42 an thar.
# Khawlailung, Thenzawl leh Hmunthaah chhungkaw 80 chu dragon fruit chin tirin thingtlang lo neih an bansan.
# Leilet neitute tan hmun hrang hrang 40-ah tuikawng siam a ni.
# Tuihna humhalh leh tihpun kawnga tan la in, khaw 37-ah check dam an siam.
# Serchhipah ran chaw siamna an bun a.
# Hualtu, Rullam, Sialsir leh Lungchhuanah IFS hmangin thingtlang lo neih bansana huan nghet nei turin chhungkaw 80-100 an pui.