IFAD (International Fund for Agricultural Development) hotute chuan Ningani khan chief minister Zoramthanga hmu in Mizorama agriculture tihhmasawnna chungchang an sawipui.
IFAD bultumin FOCUS project chu Agriculture department nen thawk dunin kalpui mek a ni a. Chief minister hnenah hian sawrkar nen thawhhona tha an neih zel an beisei tih hrilhin, project kal meka harsatna an tawh thenkhat an sawi a ni.
IFAD country director Ulac Demirag chuan khawsak harsate puiha an khawsak phungin hma a sawn theihna tura eizawnna ngelnghet zawk an neih theihna’n puih leh zirtir chu an tum ber a ni tih a sawi a. Mizoramah agriculture behchhana mahni kutkawih eizawnna lama tuimi leh remhria tam tak an awm tih sawiin, an hlawhtlin theihna tura mimal chauha an tih theih loh chu tih sak turin FOCuS project leh sawrkar an thawhho a pawimawh tih a sawi a ni.
Chief minister chuan agriculture leh a kaihhnawih sector-ah Mizoram chuan potential tha tak a nei tih sawiin, ramin theihna a neihte hi tangkai thei ang bera haichhuah a, mipuiin hlawkna an tel theih tura hma lak thiam a pawimawh tih a sawi a. IFAD hmalakna chuan kuthnathawktute tan hamthatna a thlen a beisei tih hrilhin state sawrkar nen thawh dunna tha tak neih zel a duh tih a sawi bawk.
FOCUS project hian IFAD fund hmangin hna a thawk a. SCRAM (Society for Climate Resilient Agriculture in Mizoram) chu a implementing agency niin, Mizoram leh Nagaland ah kalpui a ni. Mizoramah chuan department pali – Agriculture, Horticulture, Land Resources Soil & Water Conservation leh AH& Vety thawhhona hnuaiah kalpui a ni a; Agriculture department hi nodal department a ni.
District paruk – Champhai, Kolasib, Serchhip, Mamit, Saitual leh Khawzawl district-a khaw 300 ah hma lak a ni a. Chhungkua 42797 ten FOCUS kaltlang hian hamthatna an dawng a ni.
He project-in a tum pawimawh tak chu, zawi zawia tlangram lo vah leh lo hal kalsan a, sik leh sa mila thlai kumhlun hmanga loneitute sum dehchhuah tihpun sak a ni a. Hemi tihlawhtling tur hian farmers interest group din niin, an ni kaltlang hian hma lak thin a ni. 1. IFS (CADA): Integrated Farming System (Compact Area Development Approach) hi khaw 20 ah kalpui a ni a. Ngelnghet tak leh ram tichereu lo zawnga huan kumhlun nei thei turin khaw 20 hma lakpui an ni. Heng hmunah hian FOCUS Project chuan terrace siam, tui hna khuah, tui lak leh tui dah khawlna, chang kham (log wood bunding), leh kawng laih leh siam (link road) ten hma a la a ni.
2. Ranvulh: FOCUS hian IFS-a tel tho siin ranvulhtute tan hma a la a. Vawk vulh lamah vawkte leh a in sakna a tumsak a, backyard poultry (awmhmuna ar vulh) kawngah hmeichhia te tan ar chi tha a pe a, sial vulhtute hnenah an sialin huanthlai a tih chhiat thin venna’n a hungna a siamsak bakah an awmna tur leh an hrisel zawkna turin hma a la. Kel vulhtute tan an kel vulh hnutetui tihtamna’n hma lak a ni.
3. Innovation Fund: Thalai mithiam, hmalak tum bultanna neilote tan tanpuina pek an ni a. Thalaite tan chona a siam bakah an tum tih hlawhtlinna turin kawng a siam a ni.
4. FOCUS Engineering Cell : Hemi hnuai atang hian Serchhip district-a kuthnathawktu chhungkaw 15 tan Mat lui kalkaina’n suspension bridge sak zawh tawh a ni. Hei bakah hian FOCUS district paruk huamchhungah suspension bridge 30, chhungkaw 400 vel tan siam tum a ni bawk. Kuthnathawktuten awlsam zawka an thlai thar an phurh chhuah theihna’n Agriculture Horticulture link road km.23 (concrete road) chu Serchhip leh Khawzawl district tan buaipui mek a ni.
FOCUS project vangin CM hmu Chhungkaw sing 4 chuang pui tawh
