Footpath zah lo lakah FIR thehlut
Mihring kea kalte kalna tur siam, footpath-a mahni thil dah avanga kea kal theih loha siamtute lakah Centre for Environment & Social Justice (CESJ) chuan FIR a thehlut.
CESJ thuchhuak chuan, kumin August 5 khan Supreme Court-in ‘footpath justice’ chungchanga judgment order a siam behchhanin, Mizoram, a bikin Aizawl khawpuia mimal kawngsira in nei leh sa tharten an duh ang anga mihring kea kalna (footpath) an suasam a, tan bung a, chhung pawng a, bungraw chhekna atan an hman titawp tura ngenna, Aizawl Municipal Corporatio commissioner hnenah lehkha an lo thehlut tawh a. An lehkha thehluh hi AMC joint municipal commissioner chuan hma an lak tur thuin kumin August 17 khan a rawn chhang tih a sawi.
Hetiang a nih lai hian Tuikual lui, Ebenezer Medical Centre Chawnpui, Dinthar area-ah mihring kea kalna (footpath) takah a bula in saten in sakna hmanrua, tuizem, rawra leh cement chawh pawlhna khawl leh rawra leh thildang dang an dah a. Helai footpath-a kal thin mihring tan kal ngaihna a awm lo tawp a, harsa takin an hel tih sawiin, hei vang hian kea kalte leh lirthei tlan intihpalh a hlauhawm hle tih an sawi a ni.
September 21 khan Vaivakawn Police Station-ah CESJ chuan FIR an thehlut a, AMC commissioner hnenah complaint an thehlut bawk tih sawiin, ‘Suppreme Court chuan, kawngsira a bik taka siam, kea kalna (footpath) a kal theihna dikna chanvo hi bawhchhiat a nih chuan, mipuiin danpui behchhanin dan angin hma an la thei a, hremna emaw zangnadawmna an phut thei. He hrem theihna dan hi Motor Vehicles Act 1988 hnuaia dan awm sa nen erawh a inang loa, a hran daih a ni, tiin footpath thubuai judgment order-ah a tarlang a. Footpath-a kea kal thinte aiawhin kan ding zel dawn a ni,’ CESJ chuan a ti.
Footpath zah lo lakah FIR thehlut
