Daily Newspaper

Force mi leh civil dahpawlh tawh dawn lo

15

Darkar 24 chhunga Covid-19 kai Mizoramah an pun tak hluai avanga hmalak tul leh ngaihtuah ngaite relin Pathianni khan Health & Family Welfare minister Dr R. Lalthangliana hoin sawrkar hotulianten thutkhawm hmanhmawh an nei.

Health minister chuan Inrinnia swab sample test result chhuakah mi mi 55 Covid-19 kai hmuhchhuah a ni chu nikhat thilthu a Mizorama Covid-19 kai hmuhchhuah tam ber a la ni tih a sawi.

“Kan hmalam hun tur a hriat loh a, nikhat thilthuah Covid kai pung thur thur thei dinhmunah kan din avangin a kaite enkawlna tura kan ruahman sa Covid Care Centre, Dedicated Covid Health Centre (DCHC) leh Dedicated Covid Hospital (DCH) te hian min dawl zo dawnlo a, ngaihtuahna sen a tul bakah para-military force-te awm dan tur pawh ngaihtuah a pawimawh,” a ti.
Chief minister Pu Zoramthanga thahnemngaihna avangin district 10-a dah tur Truelab Quattro Real Time Quantitative Micro PCR khawl pawh lei fel tawh a ni tih minister hian sawiin, tun kar chhung hian Mizorama phurh thlen a nih a beisei thu a sawi.

Paramilitary force leh civil mite Covid Care Centre (CCC) khata dahpawlh tawh loh tura ruahmanna siam a ni a. Serchhip Nursing School chu BSF ho dahna bik atan, AYUSH Hospital Thenzawl leh Tribal Art Centre Tanhril chu paramilitary-force leh sipai dang Covid-19 kaite dahna tura ruahman niin, Zokhawsangah Assam Rifles ho inenkawlna CCC a awm bawk a ni.

Civil mi Covid kaite enkawlna atan Beraw CCC leh Multipurpose Centre ITI Veng chu hman tura ruahman a ni.

Mizorama Covid kai hmuhchhuah zinga hmun lia thena hmun thum vel para-military force an nih avangin para-military force ho zawm tur inkhunghran inkaihhruaina mumal tak siam a, anmahni pawh Covid-19 chungchanga hriat tur pawimawhte hrilhfiah nawn a tul nia hriat a ni a, hemi atan hian hma lak nghal a ni.

Para-military force te hi kumin May 20 atang khan Mizoram sawrkar chuan vawi engemawzat lehkha thawnin Mizoram chhunga an veivah dan titlem tur leh fimkhur turin a hriattir thin a. Assam Rifles hi August 15 hma chu Mizoram pawn atanga rawn lut lo turin anmahni lamin ruahmanna an siam a, BSF pawhin battalion insawn tur an thulh lailawk tir a, loh theihloh thilah lo chuan Mizorama lut lo tura hriattir niin an rawn luh pawhin an hming nen chhinchhiah vek an ni tawh a ni.

  • Aizawla Covid Care Centre hrang hrang – Tribal Art Centre Tanhril (khum 50 awmna), Beraw CCC (khum 39), Zokhawsang CCC (khum 46, Assam Rifles inenkawlna), Multipurpose Centre ITI (khum 49) ruahman fel tawh a ni a. Synod Camping Centre, Neihbawih Sihphir chu khum 80 vel dah theih tur beisei niin tunah hian a enkawltute nen indawr mek a ni. Thenzawla AYUSH Hospital (khum 40) leh Lengpuia AYUSH Hospital (khum 8) te chu CCC atan hman an ni bawk.
  • Serchhipa nursing school sak zawh tawh la luah loh chu CCC atan ruahman a ni a; tunah hian cheithat mek niin, kawlphetha leh tui lakluh fel a ni tep tawh a, tunkar chhung hian zawhfel beisei niin khum 100 awm thei tur a ni.
  • Dedicated Covid Hospital atana hman State Referral Hospital Falkawn – Zoram Medical College ah hian Covid kai enkawlna tur khum 64 a awm a ni.

ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy