Tun hnaia Mizoram CAMPA Governing Body thutkhawmnaah, hmasawnna hnathawhna avanga kum 1990 atanga Mizoram ramngaw tihchereu zau zawng chu hectare 11,769 a nih thu tarlan a ni a. Hmasawnna hna thawktu (User Agency) ten ramngaw an thiah avanga ramngaw rulhna National CAMPA(Compensatory Afforestation Fund Management & Planning Authority)-a an chhunluh atanga 90% chu Mizoram hian a dawng a, chu chu cheng vaibelchhe 212.15 a nih thu pawh tarlan a ni.
Kum 35 chhung hian hmasawnna hnathawh avangin ramngaw hectare 11,769 (117.69 sqkm) chu Non-Forest-ah a chang tihna a ni a. Chawhrualin kum tina ramngaw tihchhiat hi hectare 336.25 (3.36sqkm) ang a ni a. Ramngaw tihchhiat avanga zangnadawmna Mizoramin a dawn zat hi hectare khatah cheng nuai 1.8 a ni bawk.
Hmasawnna hnathawhin ramngaw a luahlan zau zawng ang hu hi hmun dangah ramngaw thar din (afforestation) leh tura tih a ni a. Hemi kawnga Mizorama ramngaw thar din lehna hnathawh dan endiktu Save Environment Association of Mizoram (SENVA) chuan CAMPA Annual Plan of Operation 2020-21 leh 2021-22 hnathawh dan grade a pek chu 7.5/10 (very good) tih a ni.
Chumi awmzia chu, ramngaw thar din lehna hi ‘a tha hle’ tihna a ni. A endiktuten a ‘tha hle’ an tih chuan mipui lam chuan ‘a lawmawm e’ tih mai loh chu sawi theih kan nei lo. Khawi khawiah te nge ramngaw thar chu din a nih hlawm a, eng thing te nge phun a nih tih chu mipui lamin kan hmu pha ve tawh lova, ‘very good’ grade chu eng ang taka tha nge a nih tih hi mipui lam hmuhtir or hriattir hi an phur hle tura ngaih a ni.
Eng pawh ni se, ramngaw thar diai chu kan din thar tha hle a nih chuan a lawmawm a ni mai a. Compensatory awm ve lohna, kum tina ramngaw thiah ziah a tulna heng kan eizawnna nghet tak —shifting cultivation (buh/sawhthing etc) avang hian ramngaw hi chu a chereu chak zawk hle dawn tih a hriat a. Heti lam ngaihtuahtu tur governing body te pawh hi din ni ve se a va tha awm ve! Kan ngaihtuah ngun loh chuan, kan hma lam kum 50 lo awm leh turah hi chuan kan tlang ram hring mawi tak takte hi a kawlh sen vel vul tawh mai ang tih a hlauhawm alawm mawle!
Forest atanga Non-Forest
