English Premier League (EPL) a talbuai Nottingham Forrest chuan ni 39 hnuah an manager Ange Postecoglou an ban ta nge nge a, a hmunruak luahtu atan English manager hriat hlawh Sean Dyche an la lut fel nghal.
Season liam taah beisei phak baka chetha a, Europa League hial khel phak Nottingham Forrest hi season tharah an talbuai ta tlat a, EPL-ah vawi riat khel tawhin vawi khat chiah an la chak a, point 5 chauh hmuin 18-naah an awm mek a, tlahniam thei dinhmunah an ding mek. An dinhmun a chhiat em vangin an manager rawih lai Nuno Espirito Santo chu August thla khan an ban a, a hmunruak luahtu atan Tottenham manager hlui Ange Postecoglou an la lut. Postecoglou hnuaiah beiseina sang tak nen inlan bawk mah se hma an sawn tak tak thei chuang lova, Pathianni zana an khingpui Chelsea lakah 3-0 ngawta an lawm leh hnuin ni 39 hnu lekah an ban zui leh a, season kal meka an manager pathumna ni turin Sean Syche an la lut zui leh nghal.
Sean Dyche hi Nottingham Forrest player hlui a ni a, Forrest Youth team tan a khelh reng hnuin 1989-10 chhung khan senior team-ah a awm a, player tangkai a ni phak lo thung. Player anga football a chawlhsan hnuin English club Watford, Burnley leh Everton te a lo enkawl tawh a. English manager hriat lawh tak a ni. Club talbuai mek Nottinghamm Forrest-ah fiahna hautak a hmachhawn a ngai dawn a, hmasawnpui ngei tumin tan a khawh ang.
Nottingham Forrest hian an manager Dyche hnuaia inkhel an hmachhawn hmasak ber tu chu FC Porto an ni a, Portugal club lian nen hian ningani zan Europa League-ah an inhmachhawn ang.
Nottingham Forrest hian an manager thar atan Fulham manager Marco Silva an awt viau a. Silva lakchhuah a hautak vangin Sean Dyche hi an ruat ta zawk a, hma an sawn ngei a rinawm.
Forrest ah Dyche
