Kum 89 mi niin World Cup vawikhata France tana goal 13 thun tling Frenchman Just Fontaine chu a thi tih a club hlui Stade de Reims-in Nilaini khan an puang.
Tarlan tak angin, France soccer great Just Fontaine hian kum 1958 World Cup-ah khan he tournament vawikhata goal khung hnember record siamin goal 13 a thun tling a, kum 1953-1960 inkar chhung khan ram tan game 21 lek khelin goal 30 a tilut tling.
Sweden rama kum 1958 World Cup khelhah khan mimalin hming chher mah se Les Bleus chu semi-final a pelh pui zo lo.
A vanglaia striker hriat hlawh Fontaine hian a club career-ah match 283 atangin goal 259 a khung tling a; kum 1959-a a team Stade de Reims-in European Cup final an luhna kawnga player pawimawh leh thawhhlawh berte zinga mi a ni.
Fontaine vanglaia French top flight title pathum la tling Reims hian khami kum European Cup final match-ah khan sihnih faiin Real Madrid an hneh lo a, a team cham-pion-pui zo lo mah se ‘Justo’ tia an kohduat thin Just Fon-taine hian mimalin hming a chher zui leh tho a, goal 10 thunin khami kum European Cup-ah khan top scorer a ni.
Nilainia an legend thih thu Reims-in Twitter kaltlanga an tarchhuah rualin thlahna thumawi tak an phochhuak tel a: “French football star, striker tha chungchuang, legendary Reims player chu a kal ta a, Stade de Reims chuan a chhungte kan tuarpui takzet a ni,” tiin.
French champions Paris St Germain pawhin Twitter-ah bawk sunna leh an ui thu bakah thihna luipui a daikai lai hian an hre reng tih an tarchhuak ve bawk.
Football khelh hmanga eizawnna a bansan hnuah coaching lam luhchilhin, kum 1974 daih tawh khan Fontaine hian a team enkawl PSG chu first division a kaipui.
France great Fontaine a thi
![](https://theaizawlpost.org/wp-content/uploads/tap_logo-min-large.jpg)