France in quarter-final an lut

World Cup 2026 khelh mek chu Inrinni zan leh Pathianni zing atangin last 16 khelh tan a ni a, champion tura rinkai France chuan harsa taka Paraguay hnehin quarter-final an lut. France hian 3-0 a Canada sawptu Morocco an hmachhawn zui leh dawn.
Inkhel hmuhnawm leh harsa Champion tura rinkai leh World Cup 2026 a khel tha tluang tak, an khingpuite lakah goal 13 ngawt thun a, goal 2 chauh la chhuah France hian 4-2-3-1 formantion hmangin Paraguay an hmchhawn a. Hnehna changa quarter-final luh ngei tumin tan an khawh. Last 32-ah rin loh taka team lian Germany hneh a, inlehthalna lian thlentirtu Paraguay in 5-4-1 formation hmangin team lian an hmachhawn a, nasa taka an goal veng a, an khingpuite nawr let thut tumin tan an khawh. An tlarhnung an veng nasa bawka France lakah meuh pawh an him rei viau nghe nghe.
Player nei tha tak France in goal thun tumin tan khawh nasa viau mah se Paraguay tlarhnung inrem phui tak an thiat thei bik lo a, chawlhlawk hmain shot on target an nei thei lo hial nghe nghe. Paraguay in an khingpuite an zimtawt zung zung a, hmunawl an pe duh lo. An zimtawt zung zung bakah tharum an hmang nasa a, an khingpuite chhaih thimrim tumin ngeiawm an chhuah a, an khingpuite hi an dim lo viau nghe nghe. Inkhel hmuhnawm takah chawlhlawk hmain goal lut a awm thei lo phawt.
Chawlhlawk hnu lamah inkhel a hmuhnawm chhunzawm a, France in goal thun an harsat chhunzawm zel. An khingpuite tlarhnung an thiah theih loh reng hnuin bench atanga lut Desire Doue chuan penalty a hlawhhhuak ta hlauh. He penalty hi ‘Mr World Cup’ ti hiala an koh Kylian Mbappe chuan awlsam takin a pet goal a, minute 70-naah hmahruaina goal a thun.
Goal an chhuah hnuin Paraguay in goal thun tumin tan an khawh a, a fet leh zual sauh bawk. France laka an chet dan a mawi loh em vangin South American team hian sawisel an hlawhzui viau nghe nghe a. Mbappe ngei pawhin a hmachhawn tawh zawng zawnga tenawm ber an nih thu a sawi zui hial nghe nghe. Inkhel hmuhnawm tak hi goal luh belh lovin a tawp a. Harsa taka chak France in quarter-final an lut.
Inrinni zana inkhelah Morocco chuan inelna thlengtu zinga mi Canada chu 3-0 in an hneha quarter-final an lut ve bawk. Morocco hian World Cup 2022-ah semi-final-a an hneh loh France an hmachhawn zui leh dawn a, chakin semi-final luh ngei an tum ang.