April 29, Inrinni zan khan Coupe de France final khelh a ni a. Toulouse chuan an khingpui Nates chu 5-1 ngawtin an hneh a, awlsam takin champion in, a vawikhat nan French Cup-ah ropui takin an champion.
Stade de France a final-ah hian Toulouse in bul an tan tha viau a, inkhel tan atanga minute lina lekah Logan Costa chuan Van den Boomen corner chhuih tha tak chu hnaite atangin a tauh goal a, hmahruaina goal a thun. Hma takah goal thun a, phur taka inlan Toulouse hian goal an thun belh leh thuai, Minute 10-na lekah Spierings siam tha tak chu goal hmahruai thungtu Logan Costa chuan hnaite atangin a tauh lut nawn leh a, an goal hnihna thunin, an hmahruaina a tizau.
Minute 10 chhung leka goal hnih thun hman Toulouse hi an phur viau a, an khingpuite an thunun chhunzawm zel. Minute 23-naah Thijs Dallinga chuan Suazo long ball tha tak chu awlsam takin a pet goal a, an goal thumna a thun a. Thijs Dallinga hian minute 31-naah an goal lina a thun belh zui leh cheu a. Chawlhlawk a nih meuh chuan si li faiin hma an hruai hman der tawh.
Chawlhlawk hnu lamah Nantes in an khel tha ve hret a, goal thun hmasa zawkah an tang ve ta hial. Minute 75-naah penalty an hlawhchhuah chu Ludovic Blas chuan a pet goal a, an si phurh sut thenna goal a thun. An si phurh an sut then vangin phur thar deuh hluai mah se an phur rei lova, an phurna mei leih mihsak an ni leh thuai. Minute 79-naah Zakaria Aboukhlal chuan Toulouse goal ngana a thunin an chakna a nem nghet a, hnehna lian sualchhuakin, an champion zui ta a ni.
French Cup champion thar Toulouse hi kum 1970 khan din thar leh a ni a. Season liam ta khan Ligue 2 atangin Ligue 1-ah an kaisang a. Ligue 1-ah 13-na an ni mek. Final-a an sawp Nantes kha Ligue 1-ah 16-naah an awm mek a, tlakhniam pumpelh tumin thapui an thawh chhunzawm a ngai dawn.
French Cup champion Toulouse
