Daily Newspaper

French driver him chhan ‘halo’

11

Bahrain Grand Prix chetsualna rapthlak atanga a damkhawchhuah theihna kawngah Haas French driver Romain Grosjean chuan Formula One driver-te himna atana an duan thar ‘halo head-protection device’ an tih chu a tangkai takzet tih a sawi.

Grosjean hian amah kawmtu French media hnenah kum 2018-a a chipui Jules Bianchi thihnain a hrinchhuah driver-te himna tura car design an siamthar ‘halo’ chu a nunna chhantu a nih thu sawiin, “Jules khan ka nunna a chhanhim a ni, Jules-a chetsualna kha thleng lo chu ni se ‘halo’ hi an ngaihtuahchhuak hauh dawn lo a, halo hi awm lo se Romain Grosjean hi a awm tawh lo ang,” a ti.

2014 Japanese Grand Prix-a a chetsual atanga thla kaw hnuah Bianchi kha a hliam tuarchhuak zo loin a thi a, kha thil thlen hnu Formula One thuneitute chuan driver-te himna tur an ngaihtuahna lamah driver seat chunga dirver-te lu sawhnat theihna daltu siam chu an ngaihtuahchhuak a, ‘halo head-protection device’ an tih tak mai chu Pathiannia tlankawng hungna thir bang su nghektu Grosjean chuan a damchhuah theihna chhan puiberah a puh ta a ni.

Grosjean chuan a chetsual lai boruak sawiin, “Bang ka sut bur hnu khan ka han meng a, ka inphuarbehna ka hlip a, min dangtu engemaw hi ka tauh fuh a, halo ni ngeiin ka hria a, ka han thu leh a, tu emaw min tanpui turin an lo kal ngei ang tiin ka inbe mawlh mawlh a, khatih lai khan kangmei a chhuak ti ka la hre lo.

“Ka veilam ka han hawi a, serthlum rawng vek hi a lo ni a, mak ka ti em em mai a, ka helmet hmalam khawthlirna plastic keh them kang atang chuan meialhin min tuam tih ka hrechhuak ta chauh a, car atanga tlanchhuah ka tum a, ka hlawhtling lo.

“1976 German Grand Prix-a chesuala kang zui ta chiam Niki Lauda ang mai kha ni dawnin ka inhria a, chutiang chu a ni thei lo tiin ka inbe leh mawlh mawlh a, talchhuah ka han tum leh ngial a, ka tang tlat a, ka thu leh ta ringawt a, thihna chu ka hmu hnai hle a, ka taksa pawh a hahdam thlap tawh a, engkim a tawp ta tiin ka inhrilh a.

“Ka taksa khawi lai nge kang hmasaber tur tih pawh ka hrethiam lo a, ka kut a ni ang tih pawh rin ngaihna ka hre lo. Ka han tang leh vak a, ka ke veilam chu pedal-ah a tang a lo ni a; a lehlam tihtantir tawh loh ka tum a, ka kut chu meialah ka nghat lo thei lo a, ka kutkawr bun pawh a dum nghal thawt a, na ka ti nghal a, ka kut a kang ngei tih ka hre thei a, cockpit atanga ka awm ka dahchhuah theih tak hnu chuan ka damkhawchhuak dawsn tih ka hria a, bang chu lawnliamin, doctor lo awm chuan ka kawr min hlihsak nghal sawk sawk a, ‘thu rawh le’ min ti a.

“A nghawng kal zel erawh a chhe ta lo hlauh a, mite chuan nikhaw hre loa awm tur emawin min ngai vek a, mahse, chutiang engmah a thleng lo a, (FIA Dr) Ian Roberts-a min biakna zawng zawng ka hre vek a, ka kutkawr kar sawr mek hlih nghal a ngai tih pawh ka ngaihtuah-chhuak nghal chiah a ni,” a ti.

Grosjean chuan thi ngei tura a inngaih hnu pawha damkhawchhuah dan kawng a dap zui zelna kha a chak ber niin a sawi a, chet lak dan tur a ngaihtuahchhuak thei khan a pui bawk tih a sawi.

“Thihna ka hmu hnai thiak thiak kher mai a, kha ngaihtuahna kha tu chungah mah thleng ve turin ka duh ngai lo ang. Ka huntawn khan ka hringnun chu a thlakdanglam kumkhua tawh dawn a ni. Ka han tarlan tel duh chu – khatih lai khan ka hlau miah lo a, ka talbuai hek lo a, mahse, khati ringawta tawp tur kha chuan ka inphal bik lo.”

Grosjean hian a thil tawn atang khan thih rapawmna chungchanga kum 2012 atanga a rawn thin psychologist a bepawp tih sawi chungin, season-ending Abu Dhabi Grand Prix lam a thlir zui leh mek tih a tarlang tel.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy