French Open 2023 draw: Djokovic versus Alcaraz
Tournament lian draw-ah final hmaa intawng thei lo turin player tha thenkhat thlur hniha then phawk an ni thin a, mahse, tuntum French Open men’s singles draw-ah chuan thlur thuhmun (same half)-ah champion thei tura rinkai pahnih Novak Djokovic leh Carlos Alcaraz an awmtlang tlat mai a, final thlen hmain a tu emaw zawk zawk an tlak hrim hrim a ngai dawn!
Serb Djokovic hian a tum thumna atana Roland Garros title a beisei rualin Rafael Nadal nen record intawma men’s Grand Slam singles title 23 an lak tlin dun tawh atangin record malkhalh a tum dawn a, hetih kawngah hian an tlang chho zel a nih chuan world number one Alcaraz nen semi-final pakhat zawkah an intum a ngai dawn tlat a, mahse, Grand Slam champion ni chunga a vawikhata’na major tournament khel tur Spaniard hian Paris khaw tournament lianah ‘pressure’ sang tak a hmachhawn tel dawn a, grand slam boruak sang ber bera tawnhriat ngah tawh Djokovic tan hamthatna a awm phian thei bawk!
Spaniard Alcaraz hian qualifier lakah tournament bul a tan dawn a; seeded third ni chunga Paris khuaa inlan tur Djokovic hian a bultanna inkhelah American Aleksandar Kovacevic a hmachhawn thung ang.
Paris khuaa Briton-te dinhmun
Mipa singles lama British player pathum kan hmuh tur zinga pakhat Cameron Norrie chuan a opening round-ah France player Benoit Paire a tum dawn a ni.
British singles hope Norrie sut tur Paire hi player rinlawk harsa ve tak niin, tualchhung tlangval a nihna hian tantu a ngah phah dawn bawk a; nikum US Open first round-ah khan 14th seed Norrie bawk hi suin a tlawm zawkah a tang.
British number two Dan Evans pawh seeded 24th ni chungin Paris-ah a inlan dawn a, a bultannaah Australian Thanasi Kokkinakis tumin, Briton dang, kum 21-a upa Jack Draper chuan a Roland Garros main-draw debut-ah Argentina player Tomas Martin Etcheverry a su ve bawk ang.
World number one hlui Andy Murray chuan grass-court season lama insawrbing a duh avangin karliamta khan French Open-a a inhnuhdawh thu a puang a, kumin Roland Garros-ah hmuh tur a awm ve dawn ta lo a ni.
British number one hlui Kyle Edmund pawh draw tan hma lawk khan khup na avangin a inhnukdawk.
Men’s competition-ah hian Britain player pathum Ryan Peniston, Liam Broady leh Jan Choinsk-te chuan three rounds of qualifying paltlang zo lo.
British hmeichhe grand slam champion Emma Raducanu pawh main draw chang tur a nih laiin a banrek leh kheimit hliam an zai avangin a tel thei dawn lo.
Chutih laiin British player dang paruk – Harriet Dart, Katie Swan, Katie Boulter, Heather Watson, Lily Miyazaki leh Francesca Jones-te chuan qualifying round an paltlang zo lo a, heti a nih takah chuan kumin French Open hmeichhe singles draw lamah Briton hmuh tur an awm dawn ta lo a, 2009 US Open hnu lama Grand Slam main draw-ah he ram nulate an tel loh vawikhatna tur a ni!
Nadal tel lo French Open chu!
Kumin hian he tournament-a record siam nawn awn awn chunga champion ngun ber Rafael Nadal chuan khel bawr hliam avangin a tum 15-na atana French Open men’s singles champion nih leh beiseina a tihlawhtling zo dawn lo a, hei hi kumin Paris khaw tournament-a sawi hlawh berte zinga pakhat a ni mek.
Kum 36 mi Spaniard hian karliamta mai khan kum 19 chhunga a vawikhatna atan Roland Garros-a a chhuah theih loh tur thu a puang a, Ningania draw-ah pawh hmuh tur awm loin, mipa singles defending champion tel lo French Open hi a khawharthlak dawn!
Grand slam mipa singles record kawl tam ber pakhat zawk a inlan theih dawn tak lohah chuan mit zawng zawng Djokovic-a chungah a fu dawn ta a ni.
Karliamtaa kum 36 tling chho ve chiah Serb hian final thlen hmain nikum US Open champion leh kumina chetha mar zet, kum 20 mi Alcaraz a paltlang zet a ngaih hmel a, hei hi a record malkhalh tur dang theitu tura ngaih a ni.
Men’s draw thlirna dang
Russian thiampuipa Daniil Medvedev pawh hi Djokovic tana tawrhhlelhawm pha thei tura ngaih zingah telin, karhmasa mai khan Italian Open-ah a champion a, Paris-ah hian seeded second ni chungin qualifier lakah bul a tan ang.
Women’s singles thlirna
Top seed ni chunga inlan tur de-fending champion Iga Swiatek chuan a tum thumna atan French Open title a beisei leh mek a, Spanish world number 67 Cristina Bucsa tum chungin cam-paign bul a tan dawn.
Kum 21 mi Poland nula hi malpui na atangin la damchiang chiah lo mah se a tum lina atana Grand Slam title a beisei lehna turah inhnukdawk zawngin a khawsa rih lo phawt.
Kumin January thlaa Australian Open title hawntu Belarusian second seed Aryna Sabalenka pawhin major title lak zawn a tumna kawngah an ram hmelma Ukraine mi Marta Kostyuk a tum hmasaber dawn a, anni pahnih inkhel tur hi tournament tir lam match-a ngaihven hlawh tur zingah a tel mek.
Belarus hi Ukraine run mektu Russia thupualpui langsar ber niin, Kostyuk hian an ram runtu Russia leh an sa-ngawizawnpui Belarus hi khawvel hriatah a sawisel reng a, Russian leh Belarusian player a hmachhawn chang pawhin khelmuala a tumpui chibai buk a hnial fithla thak thak thin kha a ni a, Sabalenka nena an insut hunah pawh hian chak duhna sang tak leh thinurna nen khelmual a luh leh ngei rin a ni!
Italian Open hmeichhe singles title latu Wimbledon champion Elena Rybakina chu seeded fourth ni chungin a inlan dawn bawk a; Swiatek nen thlur thuhmunah an awm a, an tlang dun zel a nih chuan champion tura rinkai ve ve hi semi-final lamah an insut a ngai dawn.
Nikumah Wimbledon huaihawttute’n Russian leh Belarusian player-te chhuah ve an khap avangin ATP leh WTA lamin London tournament kha ranking point a kentel an phal lo a, kha vang khan Rybakina ranking pawh hi a hniam phah ta a; French Open-ah hian a opening match-ah qualifier a tum ang.
Third seed Jessica Pegula chuan bultanna hautak zawk a hmachhawn a ngai dawn a, a tum hmasak ber tur hi a chipui American Danielle Collins niin, world ranking lamah 45-na daih ni mah se Collins hi nikuma Australian Open final khel pha ve ngat a nih avangin Pegula tan Nu Thuri zuam ngawt chi a ni lo mai thei!
Inkhel hmasa ngaihven hlawh tur zingah two-time major champion Victoria Azarenka leh 2019 US Open winner Bianca Andreescu insu tur hi a tel bawk ang.
French Open tan hun tur
Naktuk, May ni 28, Pathianni hian
French Open main draw an khel tan dawn a, June ni 11, Pathianni thleng a awh ang.
Direct-a main draw thleng zo lote tana he tournament khel pha tur zawnna qualifying chu May ni 22, Thawhtanni atang khan an khel tan thung.
Singles top seed luahtute
Kum dang ang bawkin seedings hi draw hmaa world ranking behchhana siam a ni a; mipa singles lamah ATP ranking thar bera Djokovic hmakhalha men’s world number one nihna chang hlimhlawt Spain player Alcaraz chu top seed a ni.
Women’s draw lamah defending champion Swiatek chu world number one niin, Pole tan hian a zawna major title lak tuma Paris thlawklut ve tawh world number two Sabalenka chu a elpui lian ber tur a ni ang.
French Open 2023 draw: Djokovic versus Alcaraz
![](https://theaizawlpost.org/wp-content/uploads/2023/05/djo-1.jpg)