French Open 2026 mipa final chu Pathianni zan khan khelh a ni a, inkhel hmuhnawm takah Flavio Cobolli hnehin Alexander Zverev a champion. Player tha pawl tak ni chunga hun rei tak a nghah Grand Slam title a nghah chu a nghakchhuak a, Wheel Chair nen lungngai taka lo chhuahsan tawh Court Philippe-Chatrier chu trophy nen ngei hlim takin a chhuahsan ve ta.
Final chu
Olympic leh ATP Final-ah te champion thei chunga Grand Slam-a champion thei tlat lo, French Open 2026-ah Seed no 2 Alexander Zverev chuan seed No 10 Flavio Cobolli a hmachhawn. Final-ah ranking leh seed-ah a hnuaia awm a hmachhawn vangin Zverev tan champion theihna kawng zau zawk a inhawng a, a hun a inherchhuak tawh ngei tura ngaihna a lian hle.
Rin lawk ang ngeiin final-ah Zverev-a’n bul a tan tha a, set khatnaah break a nei zawnin game khat chiah a hloh a, awlsam takin set khatna a la. Set la hmasa zawkah tang mah se Zverev a inringtawk zo tlat lo. Pressure nei tlem zawk leh phur taka inlan Coboli-a’n na takin a nawr let. Zverev hian break theihna hun remchang tha zet mai nei bawk mah se tlo lova, a che nawi leh tlat a, a hun tha a hloh. Italian hian break pawimawh tak a neih a chhawr tangkai a, rin loh takin set hnihna a la.
Set khat ve ve an lak hnuin an inhnehtawk zui hle a, rinkai zawk Zverev zia a zawi zawk a, a champion loh mai a hlauhthawnawm leh hman. Phur taka inlan Coboli a chesual a, a serve a hum zawh loh vangin Zverev-a’n a set hnihna a la a, champion a hnaih.
Phur leh thatho taka a inlan zui ngei a rinawm laiin pressure zo lo thina ngaih Zverev an set linaah bul a tan chhe hle a, a serve hmas ber a hum zo lo nghal ringawt. A dinhmun chhe hman viau mah se break a nei let a, a dinhmun a siamtha. Hmahruai theihna hun tha tak nei bawk mah se a serve a hum zo lo leh ringawt. Set a hloh ngei tura ngaih a nih laiin break a nei leh hlauh a, tie-break khelh a ngai. Tie-break-ah bul tan tha bawk mah se a tlo zo lo leh a, double fault te a nei leh ringawt bawk nen set lina a hloh leh phawt.
Deciding set khelh a ni a, set pawimawh takah mak tak maiin Zverev a chetha ta tlat thung a, break a nei zawm a, game khat chiah hloh chungin set a la leh ta mai a. Flavio Cobollia lakah 6-1 4-6 6-4 6-7 (5-7) 6-1 a hnehna changin Grand Slam-ah a champion ve ta nge nge!
Zverev hun a thleng
German star Alexander Zverev hi Tennis-ah player tha leh hmuhnawm ber pawl a ni reng a. Olympic leh ATP Final-ah pawh a lo champion hial tawh. Inelna lian dangah champion tawh mah se inelna lian ber Grand Slam-ah eraw a champion thei tlat lo. US Open final-ah Dominic Thiem hneh lovin a champion zo lo. Australian Open final-ah Jannik Sinner lakah a zawr a, a champion zo lo leh a. French Open 2024 final-ah set hnih 2-1 in hmahruai bawk mah se a zuih tak zet a, Alcaraz lakah a mualpho zui leh. Tunhnaiah Jannik Sinner a ngam lo tak zet a. Sinner a dam that phawt chuan Zverev tan champion na chance a awm lo a ni ber mai.
French Open 2026-ah hian champion lai Carlos Alcaraz a inlan thei lova, champion tura rinkai Jannik Sinner pawh khawlum lutuk tuar lovin a tla hma viau bawk. SInner a tlak hnu lawkah Grand Slam-a vawi 24 zet champion tawh Novak Djokovic a tla ve leh a. Clay Court a khel tha thei tak Casper Ruud a tlo zo lo bawk. Player langsar tak tak an awm loh thup hnuin Zverev a langsar a, a tan champion theihna hun tha bik; Golden chance ni ngeia ngaih a ni.
Zverev hian final-ah ranking leh seed-ah a hnuaia awm Coboli a hmachhawn leh zel bawk si a, a tana hun ruat a inherchhuak tak meuh meuh. Champion theihna hun tha ber a neihah pawh dik tak chuan beisei a phak tehchiam chuang lo. Service a tisual fova, a ball vuak a nat loh bakah a ball dahna a fing tawk thin lo. Coboli hian Zverev khelh dan a hrechiang hman viau a, a nawr buai fo bawk. Player tha a hmachhawn a, boruak sangah zuai a, beisei phak lo thin kha a la ni reng a. A champion zo dawn lo emaw tih hnuah a champion ve ta nge nge. Zverev champion dan hi chung lam bel ruat ngei a ni.
A hlim ve ta e!
French Open 2022 semi-final ah Rafael Nadal nen an inhmchhawn laiin Zverec hian hliam ta tak a tuar a, Wheelchair nen khelmual a chhuahsan. A hliam hi zai a ni a, ni 1,465 zet a chawlh a ngai. Hliam vanga hun rei tak a chawlh hnuin inelna hmachhawn turin a kir leh. Player tha fal pahnih; Jannik Sinner leh Carlos Alcaraz an lo chhuak zui bawk nen Zverev tan Grand Slam a champion na kawng a inkhar tawh ang hiala ngaih a ni hman. Hun rei tak a lo nghah tawh chu mak tak maiin a nghakchhuak ta hlawk a, French Open champion thar a ni ta.
2022-ah mittui nen lungngai taka a chhuahsan Court Philippe-Chatrier ngei mai chu trophy nen ngei hlim nui sang chungin a chhuahsan ve ta.
French Open champion Zverev
