Infiamna ngaihsan hlawh tak ‘Gentleman’s Sport’ an tih hial thin chu ‘Tennis’ hi a ni a. Tennis-ah hian inelna lian bik pali; Australian Open, French Open, Wimbledon leh US Open te a awm a. Heng inelna lian palite hi ‘Grand Slam’ tih an ni.
‘Grand Slam’ tih hi hriatthiam awlsam danah chuan; ‘inelna lian ber, lawmman leh ranking point pawh tam ber, mipui leh media te pawhin an ngaihven ber leh game khelh chhung pawh rei ber’ tihna a ni. Tennis-ah hian inelna hrang hrang a awm a, inelna dang zawngah chuan mipa leh hmeichhiain set thum zel an khel thin a. Grand Slam-ah hi chuan mipain set nga an khel a, hmeichhiain set thum an khel ve thung. Grand Slam-a champion te hian ranking-ah point sang hnih (2,000) theuh an neih belh thin. Grand Slam hrilhfiahna ang hian inelna dang zawng zawng aiin Grand Slam pali-ah hian lawmman leh ranking point a tam ber a, mipui ngaihven hlawh ber a ni bawk.
Tennis-a ‘Grand Slam’ hi kum 1933 khan hman tan a ni a, a chingchhuaktu chu American journalist John Kieran a ni. Kum 1933 khan Australian Tennis player Jack Crawford chu inelna lian pali, Australian, French, US leh Wimbledon-ahte champion vek thei dinhmunah a ding a. Australian, French leh Wimbledon-ah a champion hnuin US Open-ah final lut leh mahse, final-ah a vanduai hlauh thung. Jack Crawford hi inelna lian pali a champion vek theih a nih lai hian Journalist John Kieran hian inelna liana palia champion sawi nan hian ‘Grand Slam’ hi a hmang a. Heta tang hian ‘Grand Slam’ hi an hmang zui ta zel a ni.
‘Inelna lian ber, lawmman leh ranking point pawh tam ber leh mipui pawhin an ngaihven ber’ tia ‘Grand Slam’ kan hrilhfiah bakah hian ‘Grand Slam’ hian awmze hrang leh kawh hran a nei ve leh thung. Inelna lian bik pali (Grand Slam) ah kum khat chhunga champion vek sawi nan ‘Grand Slam’ hi hman a ni ve leh. Kum khatah Grand Slam pali-a champion vek thei mi panga (5) chiah an la awm a, chungte chu; Don Budge (1937), Maureen Connolly Brinker (1953), Rod Laver (1962 & 1969), Margaret Court (1970) leh Steffi Graf (1988) te an ni.
Kum khatah Grand Slam pali a champion vek sawi nan ‘Grand Slam’ hman a nih lai hian kum khata champion vek kher lo, Grand Slam pali-a champion kim sawi nan hian ‘Career Grand Slam’ tih a ni ve leh. Tennis huanga ngaihhlut hlawh ber chu ‘Super Slam’ a ni a. Hei hi kum khatah Grand Slam pali-a champion kim vek bakah Olympic-a champion a, ram leh ram inelnaa champion b^kah kum khata player che tha zual inelna ATP / WTA Finals-a champion sawina a ni. Leilung pian tirh ata tun thlengin ‘Super Slam’ puitlin thei an la awm lo. Ngaihhlut hlawh >m >m pakhat chu ‘Golden Slam’ a ni leh. Hei hi kum khatah Grand pali a champion b^kah Olympic a champion bawk sawina a ni a. Tun thlengin Golden Slam puitlin thei pakhat chiah a awm a, chu chu Germany Tennis player popui, Steffi Graf a ni a. Grand Slam a vawi 22 champion tawh Steffi Graf hian kum 1988 khan Golden Slam a puitlin.
Tennis inelna hi hun pui pahnihin then hran phawk a ni a, a hmasa z^wk chu ‘Amateur Era’ tih a ni a. Hei hi kum 1968 hma lam zawng sawi nan hman thin a ni. Kum 1968 atang hian ‘Open Era’ tih a ni ve ta thung.
Grand Slam pali a awm thu kan sawi tawh a, chungte chu Australian Open, French Open, Wimbledon leh US Open te an ni tih pawh kan tarlang tawh bawk.
Grand Slam pali zingah Clay Court a khelh awmchhun French Open hi kum 1891 daih tawh khan inelna neih tan a ni a, kum 1925 atang khan Grand Slam-ah telh tan a ni. Kum 1928 atang khan tuna an khelhna Stade Roland Garros-ah hian khel tan a ni. May thla chawhnu lamah khelh tan niin, June thla tir lama zawh fel thin a ni. ‘Roland Garros’ tia hriat lar ni bawk French Open-ah hian vawi 14 zet champion tawh Rafael Nadal chu mipa lamah champion ngun ber a ni a, hmeichhe lamah vawi sarih champion tawh Chris Evert chu champion ngun ber a ni ve thung.
French Open 2023 hi May 28, Pathianni atangin khelh tan a ni dawn a, vawi 14 zet champion tawh Rafael Nadal a tel theih dawn loh vangin kumina inelna hi a khawharthlak deuh ruih dawn. Nadal a inlan theih dawn loh vangin Novak Djokovic chu player ngaihven hlawh, mi mit fuk rawnna a ni dawn a. Grand Slam-ah vawi 22 champion tawh Djokovic hi a champion a nih chuan mipa lamah Grand Slam-ah champion ngun ber a ni nghal ang.
Tarlan tawhangin French Open 2023 hi May 28, Pathianniah khelh tan a ni ang a. June ni 11, Pathianni zanah zo fel tura ruahman a ni. French Open 2023-ah hian a vawi khat nan computer hmangin line endik a ni tawh dawn a, linesman-ah mihring an tan tawh dawn loh vangin inhnialna tam tak a bo tura ngaih niin, game a rei lo deuh zawk tura beisei a ni bawk.
French Open thlir zauna
![](https://theaizawlpost.org/wp-content/uploads/tap_logo-min-large.jpg)