Fulham in United an hnawtchhuak

Pathianni zan khan FA Cup 5th round khelh chhunzawm a ni a, Old Trafford-a inkhel hmuhnawm takah Manchester United chu Fulham lakah an chak lova, FA Cup atangin an tla. Champion lai United an tlak rual hian Newcastle United pawh an mikhual Brighton & Hove Albion hneh lovin an la ve bawk.
Champion lai Manchester United hian champion zia an pu tlat a, mak tak maiin an chak leh khut thin. Arsenal lakah tlem zawk ni chunga hnehna an chan vangin fak an hlawh leh zual a, champion nawn leh turin rin an kai hle. Pathianni zana an mikhual Fulham lakah si an phurh hmasak hnuin an sut leh a, penaly shoot-out ah chak zawk tura rinkai zawk ni leh bawk mah se Berd Leno an paltlang zo lova, hnehna an chang zo ta lo a, an mualah ngei an tlawm ta thung.
Old Trafford a lenglut Fulham hi an tang thei viau a, hun pumpuiah ball chang tam zawk an ni hial nghe nghe. Manager Reuben Amorim-a’n, ‘Kawng dik kan zawh tan’ ti bawk mah se United in Fulham lakah beisei an phak lo. Inkhel hmuhnawm takah hian goal a luh theih loh reng hnuin chawlhlawk dawn hnaih minute 45+1-ah Calvin Bassey chuan Fulham hmahruaina goal a thun a, mikhual team hian 1-0 a hmahruai chungin chawlhlawk an hmang.
Chawlhlawk hnu lamah United in an si phurh sut tumin thapui an thawh chiam a, goal pawh an thun ta nge nge. Minute 71-naah captain Bruno Fernandes chuan goal thunin an si phurh a sut. An si phurh an sut hnuin United hi an phur zui viau a, chak ngei tumin an mikhualte nawr thin mah se hun pangngai leh extra-time-ah goal an thun belh thei tawh lo. Fulham pawhin goal an thun belh thei tawh bik lova, penalty shoot-out hmangin chak zawk zawn a ngai.
Tie-break-ah hian United leh Fulham tana pettu hmasa pathumin an pet goal vek a, 3-3 a ni mek. 3-3 a nih laiin United tana Victor Lindelöf pet chu Fulham si nghak Berd Leno chuan fuh zetin a dang. Lindelof pet goal loh hnu hian Fulham tana pettu Antonee Robinson chuan inringtawk zetin a pet goal zui leh a, Fulham in 4-3 in hma an hruai. Hnufual zawk an nih lai hian Arsenal laka chakna goal thuntu Joshua Zirkzee chu United tan a penchhuak. Zirkzee pet hi Leno chuan tha zetin a lo dang nawn leh. Berd Leno save pahnih hmangin Fulham hian champion lai United lakah 4-3 in hnehna hlu tak an chang a, FA Cup atangin United an hnawtchhuak zui ta a ni.
FA Cup atanga an tlak leh tak vangin United tan trophy a hla tial tial. Red Devils hi EPL-ah 14-na an nih mek a, League Cup atangin an tla tawh bawk. Europa League lamah last 16 an lut tawh thung a, Europa League hi United champion theihna awmchhun a ni tawh. Europa League atanga an tla leh a nih chuan kut bengin season an khar dawn a, kut benga season an khar a nih ngat chuan manager Reuben Amorim banin United hian season tharah manager thar an neih a rinawm.
Pathianni zana inkhel dangah Newcastle United chu an mikhual Brighton hneh lovin an tlawm a, FA Cup atangin an puanthuah an tel ve bawk.
Carabao Cup final khel tur Newcastle United hian St James Park-a an mikhual Brighton lakah an khel chhe lova, goal thun hmasa zawkah an tang. Season kal meka goal thun thei tak Alexander Isak chuan minute 22-naah penalty a pet goal a, hmahruaina goal a thun. Hma takah goal thun mah se hmahruai chungin chawlhlawk an hmang thei bik lo. Brighton tan hian Yankuba Minteh chuan minute 44-naah an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, player pahnih hnawhchhuah an ni. Minute 83-naah Newcastle player pawimawh Anthony Gordon hnawhchhuah a ni a. Hun pek belh minute 90+1-ah Brighton player Tariq Lamptey hnawhchhuah a ni zui ve leh. Minute 90 chhungin chak zawk an awm lova, minute 30 dang pek belh an ni. Extra-time-ah goal lut a awm theih lawk loh hnuin Danny Welback chuan minute 114-naah goal pawimawh zet a thun a. He a goal thun hmang hian Brighton in hnehna an chang a, FA Cup-ah hma lam an pan zel. Brighton lakah an tlawm vangin FA Cup-a Newcastle beiseina chu sarah a zam ral ta thung.