Future & Metro Boomin ‘We Don’t Trust You’ a No.1

Future & Metro Boomin ‘We Don’t Trust You’ a No.1
Future leh Metro Boomin album intawm ‘We Don’t Trust You’ chu kar khat chunga US-a album hralh that ber niin, Billboard 200 (albums) chart-ah a No.1 a, Future tan he chart-a No.1 kai thei album pakua a neihna niin, Metro Boomin tan a palina a ni ve thung. Hetihrual hian Olivia Rodrigo ‘Guts’ pawh top 10-ah a rawn lang thar ve leh ta a, Hozier pawh top 10-ah a rawn lang ve leh ta bawk.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘We Don’t Trust You’ hi kar khat chhungin US-ah 2,51,000 hralhin, No.1-ah a debut a, chung zinga 2,45,000 chu streaming atanga album hralhna tlukpui (on-demand official stream maktaduai 324.31) niin, album tak tak hralh chu 4,500 a ni a, album-a hla mal hralhna atangin 1,500 a tling thei bawk.
Kar khata album 2,51,000 hralh tlin theih hi kuminah chuan US-a kar khat chhunga hralh tam ber a la ni a, Future tan kar khat chhunga a album hralh tam ber dawttu niin, Metro Boomin tan kar khat chhunga a album hralh tam ber a ni ve thung.
‘We Don’t Trust You’ hi album inzawm pahnih an tlangzarh tur atanga a hmasa zawk niin, April ni 12 hian a chhunzawmna ‘We Still Don’t Trust You’ album an tlangzarh leh dawn a ni. Tuna an tlangzarh tawh zawk album-ah hian Kendrick Lamar, Playboi Carti, Rick Ross, Travis Scott leh The Weeknd te pawh an thawhpui.
Olivia Rodrigo album, chart No.2-a lo debut tawh ‘Guts’ chu 73,000 hralh lehin No.18 atangin No.2-ah a invawrh thar leh a. He album hi a deluxe version ‘Guts [Spilled] edition’ an tlangzarh thar leh a, tunah hian sreaming services atanga digital download album ang chauhin tlangzarh a la ni a, July ni 19-ah vinyl anb tlangzarh ang.
Guts [Spilled] edition-ah hian hla panga an dah belh a, chung zinga pali chu a album hmasa vinyl edition-ah bonus track angin an telh a, hla thar hlak ‘So American’ an dah tel bawk. Guts album hi October 2023-a tlangzarh kha niin, chart No.2-ah kar thum a lo awm tawh nghe nghe a ni.
Ariana Grande ‘Eternal Sunshine’ chu 72,000 hralh lehin No.1 atangin No.3-ah a tawlh a, chart No.1 hlui Morgan Wallen ‘One Thing at a Time’ chu 68,000 hralh lehin No.3 atangin No.4-ah a tawlh a, Noah Kahan ‘Stick Season’ chu 44,000 hralh lehin No.5-ah bawk a la awm.
Chart top 9-a lang album dang te pawh chart No.1 hlui vek niin, SZA ‘SOS’ chu 41,000 hralh lehin No.6-ah bawk a la awm a, Taylor Swift ‘Lover’ chu 40,000 hralh lehin No.7 a la ni a, Zach Bryan self-titled album chu 39,000 hralh lehin No.8-ah bawk a la awm a, Taylor Swift ‘1989 (Taylor’s Version)’ chu 38,000 hralh lehin No.9-ah bawk a la awm.
Cart top 10 khartu chu Hozier album thar, hla pali awmna ‘Unheard’ niin, 38,000 tling lo deuh hralhin No.10-ah a debut a, Hozier tan chart top 10-a lang thei album pali a neihna a ni. He album-a hlate hi a album hmasa ‘Unreal Unearth’ atana a record tawh, mahse, an dah tel leh tak loh te an ni.