Daily Newspaper

FWA Player tha ber Henderson

13

Liverpool captain Jordan Henderson chu Football Writers’ Association Men’s Footballer of the Year-ah thlan a ni.

Football ziaktu inzawmkhawm pawlten EPL-a football tha zual an thlan zingah hian Henderson bakah Liverpool tana Henderson khelhpui Virgil van Dijk leh Sadio Mane, Manchester City midfielder tha Kevin de Bruyne leh Manchester United forward Marcus Rashford te chu a sang zual panga zingah an awm. Chawimawina dawng tura thlan tak Jorder Henderson hian vote tla hmun thuma thena hmun khat aia tam mah a hmu phak hial niin tarlan a ni.

Liverpool hi tunhnai thla 14 chhungin an chetha hle a, trophy pali ngawt an hlawhchhuak. Champions League-ah Tottenham hneha an champion a, UEFA Super Cup-ah Europa League champion Chelsea an hneh leh bawk. Nikum kum tawp lam khan FIFA Club World Cup-ah a vawikhat nan an champion leh bawk. Kum 30 zet hnuah Premier League-ah an champion leh nawlh a, nilai zan khan Sir Kenny Dalglish kut atangin Reds captain Jordan Henderson hian Premier League trophy a dawng ta hial a ni a nih kha.

Goal thun pup pup lo mahse Henderson hi Liverpool muallai player pawimawh tak, an team khaidingtu pawimawh tak a ni thung. 2019-20 season-ah goal Henderson hian goal li a thun tling tawh a, assist vawi 13 a nei tawh bawk. Patthianni zan hian EPL 2019-20 khar a ni dawn a, champion thar Reds hian Newcastle United an hmachhawn leh dawn a, Henderson hian goal thun leh bakah assist neih belh theihna hun tha la nei.

Hmeichhe lamah chuan Arsenal Arsenal leh Netherlands striker Vivianne Miedema chuan Football Writers’ Association Women’s Footballer of Year chawimawina a dawng ve bawk.

Tunge Henderson?
Football chungchang ziaktuten EPL player tha bera an thlan Jordan Brian Henderson hi June ni 17, 1990 khan Sunderland-ah a piang a, ft 6 a sang a ni. An khaw club Sunderland-ah hian football nun bul a tan a, 1998 atanga 2008 tleng khan Sunderland rawlthar team-ah hun a hmang. Kum 2008 atang khan Sunderland first team-ah a inlan tan a, 2009 khan loan in Coventry a zawm zuai thung. Coventry atanga a let leh hnuin Sunderland tan vawi 71 a khel tling a, goal li a thun.

Kun 2011 khan English club ropui Liverpool in an la lut a, an tisual lo hle. Kum 2015 khan Reds captain ropui Steven Gerrard chuan Liverpool a chhuahsan a, Henderson hi Liverpool captain atan ruat zui nghal a ni. Captain nihna hi tlin takin a chelh chho a, Champions League, UEFA Super Cup, Fifa Club World Cup leh Premier League a an champion theihna kawnga thawhhlawk leh hruaitu nih tling, team khai dingtu a ni chho ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy