Group of Twenty (G20) Business Meeting-a tel tur palaite chuan Nilaini khan Aizawl an thleng a. Vawiin, March 2 hian Mizoram University Auditorium Tanhrilah hawna neih tan a ni ang.
Nilainia palai lo thleng hi mi 62 an ni a, an ni bakah hian G20 official dangte, India ram pawn atanga delegate 16 te chu Lengpui Airport-ah an lo thleng a, Mizorama delegate 90 vel he meeting-ah hian an tel bawk ang.
Nilaini zan khan Raj Bhavan-ah Cultural Night hmanpui an ni a, larsap-in palaite hi zanriah a buatsaih sak a ni.
Tarlan tawh angin, G20 a tel ram hi khawvel ram hrang hrang hausa leh khawvel economy thunun kawnga nghawng nei pha an ni a. Kum khat chhung atan G20 Summit kaihhruai, presidency hna hi member ram hrang hrangten inchelh chhawkin, kumin hi India kaihhruai kum a ni. Hemi ang hian India ram khawpui hrang hrang, hmarchhak khawpuite telin intawhkhawm hi huaihawt a ni.
Aizawla neih B20 meeting thupui tur chu, “Engagement Group – Business 20 Start Up” tih a ni a. Khawvel huap leh nghawng issue hrang hrang sawiho thin a ni.
India-in G20 Summit 2023 a thlen turah thupui atan “One Earth, One Family, One Future” tih hman a ni. Khawvel chu thupui pakhat neia kawng engkima hmasawn zawnga hmalam pana kal chu an thupui a ni.
G20 Meeting-a tel turte thleng
![](https://theaizawlpost.org/wp-content/uploads/2023/03/g20-1024x683.jpeg)