G20 hnuaia B20 business meeting chhim tur palaite chuan vawiin – March 1 atang hian Mizoram an rawn thleng tan dawn tih chief minister Zoramthanga chuan a sawi a. He meeting thleng tur hian an inpeih fel tawh tih a sawi a ni.
Thuthar thehdarhtute a hrilh danin chief minister hian, G20 hnuaia B20 business meeting thlen turah Mizoram sawrkar chu theihtawpin a inbuatsaih a, an theih chin bakah duhthusam loh na tur lai a awm theih a rin thu sawiin, he business meeting thlen tur inbuatsaih nan hian sawrkar laipui atangin sum dawn a nih thu a sawi.
Business meeting hi March 2 hian Mizoram University Auditorium Tanhrila neih tur niin, urban planning, infrastructure, bamboo, startups, skill development, handloom & handicraft, nursing and paramedics chungchang sawi ho a ni dawn a. Mizoram sawrkar leh mipui tan hmasawnna nasa tak a nih ngei a beisei tih a sawi a ni.
Mizoramin B20 business meeting a thlen tur hi, state dawmkan ngai kan nih avangte, MNF leh India sawrkarin inremna tha bik an neih avang leh ,international border-a awm kan nih avangte in ngaihpawimawh kan ni tih Zoramthanga hian a sawi a. Ram hrang hrang 17 atangin aiawh lokalin, ram leh ram insumdawn tawnna atana thil pawimawh tak tak sawiho a ni dawn a. India ramchhung leh Mizorama sumdawngmite leh G20 member ni lo, India ram thenawm leh a thiantha ram atang pawhin tel tum an awm tih a sawi bawk.
He intawhkhawm hi sawrkar laipuia minister rualte bakah official thahnem takin an rawn hmanpui dawn tih chief minister hian a sawi a. Meeting thleng tura theihtawp chhuahpuitu Prime minister Narendra Modi, Union Home minister Amit Shah leh External Affairs minister Subrahmanyam Jaishankar te chungah a bikin lawmthu a sawi tih a sawi a ni.
B20 business meeting chhimtute hian March 3-a Aizawl Sipai Lammuala Chapchar Kut lawmna pui ber chu an hmanpui nghal dawn a, hemi tur hian inruahmanna pawh a bika kalpui a ni tih a sawi bawk.
G20 meeting thleng turin inpeih
