Site icon The Aizawl Post

G20 meeting vangin hawker-te inkhar ti

Aizawlin G20 Meeting a thlen vangin khawpui kawng dunga dawrte inpho, hawker-te chu inkhar tir an ni a. Hei hi Congress party chuan rethei zawkte rahbehna nia ngaiin an hriatthiam loh thu an sawi.
Congress party thupuangtu Dr Lallianchhunga chuan thuchah siamin, Mizoramin G20 Business Meeting pawimawh tak a thleng chu an party chuan lawmawm a tiin, state tan hlawkna lian tak a neih theih an beisei rualin, sawrkarin G-20 palai lokalte kalna tur kawngpui dunga nitin eichawp zawng dawrkai – hawker-te March 1-3 chhung an inpho a khap chu nitin eichawp zawng, mi harsa leh rethei zawkte rahbehna diktak a ni tih a sawi.
β€œKan nihna diktak thup tuma hetianga mi harsa zawkte sum lakluhna tikhaihlak zawnga sawrkarin hma a la hi hriatthiam theihah Congress party chuan a ngai lo a. Mizoram hian khualtha chi hrang hrang, meeting pawimawh tak takte pawh a lo thleng tawh thin a. Tun anga mirethei zawkte rah behna hi a la thleng ngai lo. Hun lokal lehzel turah pawh thleng tawh lo se kan duh a ni,” a ti.
Mizote chu kan nihna ang taka kan lanchhuah ngam a ngai zawk niin an hriat thu leh chu chu Mizoram tan tha zawk nia an ngaih thu Congress thupuangtu hian a sawi a ni.

Exit mobile version