Army officer te chu Gabon national television-a inlanin thuneihna an thuhnuaia an dah tak thu an puang a.
Kar kalta Inrinnia inthlan result a President Ali Bongo tlinga puan chu an pawm loh thu sawiin electoral commission chuan Bongo-in opposition tena tihchingpen tia an sawi inthlanah vote hmun thuma thena hmuh hnih a hmu a ni.
Army tena thuneihna an chang a nih chuan kum 53 lai Gabon a Ali Bongo te chhungkua tena thuneihna a chan tawh chu tihtawpin a awm dawn ta a ni.
Nilaini zing khan sipai sawm pahnih lai television-ah inlanin chutah chuan inthlan result chu an pawm loh thu sawiin ram chhunga institution tin te chu an thiah nghal vek thu an sawi zui a ni.
Hei bakah hian Gabon ramri tinte chu tiamchin awm lova kharphui nghal a nih thu an sawi bawk a. Tihian Africa-a French colonoy pariat laia sorkar chu sipai ten an paihthla ta a ni.
Mahse a tam ber te chu hmar lam Sahel region lamah Islamist insurgency te tamna lamah zel a ni thung a, heng hmun te hi demcoratic taka sorkar thlan khua leh tui te pawh venghim zo lo tia puh tamna an ni.
French Prime Minister Elisabeth Borne chuan uluk takin Gabon thil thleng chu an ngaihven tia sawiin European Union foreign policy chief pawhin sipai tena thuneihna an lak chuan Africa-ah ngelngheh lohna nasa zawk a thleng ang tia sawiin, “Europe tana ngaihmawh awm tak a ni” tiin Josep Borrell chuan a sawi.
Hetih lai hian French mining group Eramet te Gabon a mi sang tam tak hnathawk nei te chuan security thil avangin an hnathawh tin an titawp nghal vek tiin an sawi a.
Tuna sorkar paihthlatute chu Gabon security leh defence forces aiawh te awmna Committee of Transition and the Restoration of Institutions inti te an ni a.
Sipai pakhat chuan TV channel Gabon 24 hnenah, “Tun sorkar titawpa remna leh muanna thlen kan tum a ni,” tiin a sawi a. “Sorkar chu mawhphurhna la lo, sawi lawk anga awm lo leh vantlang nun titlahniam zel leh ram buai nuai theia siamtu” tiin a sawi bawk.
Khawpui ber Libreville ah chuan silai a puak un un reng tia sawi a ni a. TV channel tinah te sorkar paihthlak a nih thu puan tia sawi a ni bawk.
Tun dinhmunah khawiah nge Bongo chu a awm hriat theih a ni lo va, kar kalta Inrinni a inthlan zawh hnuah internet pawh tihtawp niin hmun thenkhatah curfew puanin a lo awm lawksa tawh a ni.
Inthlan result chhuah hmain opposition candidate Alber Ondo Ossa chuan polling station tam takah mamawh tawk ballot paper pawh a awm lo tia sawiin presidential race a hming pe lut inhnukdawk site pawh ballot paper-ah paihin an awm lo tiin a sawi bawk.
Campaign group Reporters Without Borders chuan foreign media te chu an ram chhung luha vote thlak dan enfiah an lo khap lawksa tawh bawk a ni.
Bongo hian kum 2009 khan a pa Omar thih hnuah thuneihna a chang a, kum 2018 khan stroke neiin kum khat dawn engmah ti thei lovin a lo awm tawh a ni.
Gabon sipai ten sorkarna thunun ti
