Bollywood movie 2001-a an tlangzarh tawh ‘Gadar’ film chu kum 22 hnuah a chhunzawmna ‘Gadar 2’ an siam leh a, he film hi kar kalta Zirtawpni khan tlangzarh niin, tunkar Ningani thleng khan cinema hall ticket hralhna atangin cheng vaibelchhe 283.35 a lalut tawh a, tun weekend a ral leh hi chuan vaibelchhe 300 a kai hman tawh ngei dawn niin an chhut.
Gadar 2 hi Anil Sharma direct niin, Sunny Deol Ameesha Patel, Manish Wadhwa, Gaurav Chopra, Simrat Kaur, Luv Sinha, Rakesh Bedi leh Dolly Bindra te channa a ni. Bollywood box office-ah ‘Gadar 2’ hi Akshay Kumar, Pankaj Tripathi leh Yami Gautam te channa ‘OMG 2’ nen an insu a, ‘OMG 2’ hian a ngam ta lo deuh zawk a, he film hi chuan kar khat chhungin cheng vaibelchhe 84.72 a lalut tawh a ni.
‘Gadar 2’ changutpa Sunny Deol chuan, “A va hlimawm tak em. Gadar chhunzawmna kan buaipui lai khan hetiang khawpin a entute ngainat a hlawh ang tih kan ring pha lo. Gadar film hmasa zawk kha kum 20 chuang kalta ami kha a ni tawh a, chuti chung pawhin a film hmasa zawk ang maiin an la phurpui a ni. Mak ka ti a, lawmawm ka ti bawk. He industry hi a kal zel theih nan film hit kan neih fo a ngai a ni,” a ti.
‘Gadar 2’-in kar khatah vbc 280 lalut hman
