Galatasaray-in racist-ah Mourinho an puh
Fenerbahce manager ni tura nikum maia an sengluh Jose Mourinho khan chi inthliarna lam hawi zawngin tawngkam a chhakchhuak niin Turkish club lian dang Galatasaray chuan an puh a, Portuguese lakah hian thubuai thehluh hial an tintuah tih an puang.
Thawhtanni khan Fenerbahce leh mualneitu Galatasaray hi goal awm loin an inhnehtawk a, inkhelh ban press conference-ah Mourinho hi an defender kum 19 mi Yusuf Akcicek khelh dan chungchang chanchinbumite’n an zawt a, chu ta a chhan dan chu:
“Referee chungah khan lawmthu sawi tur ka ni. Inkhel tan phat minute khatna lekah khan dive chiang zet kan hmu chungin home bench lam kha penalty beisei fahranin zawng rual ang maiin an zuang suau a, kan naupang kha an kawh rawn sup sup a, Turkish referee chu ni se minute khat hnuah yellow card a phawrh ang a, minute nga hnuah a thutlukna siam chu ka thlaktir leh ang.
“Inkhelh banah referee dressing room ka pan ding nghal a, fourth official pawh a lo awm a, Turkish referee a ni nghe nghe a; referee hnenah chuan inkhel liana ani a lo awm ve avangin lawmthu ka hrilh a, chutah fourth official lam chu ka han hawi a, nang zawk hi referee chu ni se he match hi kan tan chhiatna a ni ngei ang tih ka hrilh,” tiin a sawi.
Fenerbahce boss Mourinho hian a centre back Akcicek vanga tlu nia ngaih Galatasaray player kha dive-ah puhin, inkhel hamtu referee kha Turkish referee chu ni se penalty-ah a ham leh ringawt ang a, mualneitu team Galatasaray khan penalty atanga goal khungin Fenerbahce tana tlawmna game ni thei dawnin a sawi a, Istanbul derby hamtu match referee atana Slovenian referee Slavko Vincic an lo hmang hlauh kha an vanneih phah ta niin a sawi.
Thawhtanni inkhel lian leh boruak tang lutuk tur hre lawkin club pahnih khan match referee atan foreign referee ni se tiin league thuneitute hnenah an dil a, an dil ang takin Slovenian referee chu inkhel ham tura ruat niin, fourth referee erawh Turkish referee a la ni ta tho a, chu official elsena Slovenian a fak vang chu nge tih Galatasaray hian an thuchhuahah tarlang chiah lo mah se Fenerbahce head coach Mourinho chu chi inthliarna tawngkam phuhchhuakah an puh ta a ni.
Galatasaray hian football thuneitu sang ber ber pahnihte hnenah ‘official complaints’ an thehluh tur thu an puang a, an thuchhuahah chuan, “Turkey rama manager hna a thawk dawn tih puan a nih phat atangin Fenerbahce manager Jose Mourinho hian a thuchhuah siamah reng reng Turkish mipuite zahlohna leh hmusitna lam a telh zing ta malh malh hle a, inhnialna thlen thei leh inthliarna lam hawi tawngkam a chhakchhuak awl lo a, chuvangin Uefa leh Fifa hnenah Jose Mourinho laka kan lungawilohna ‘official complaint’ kan thehlut dawn a ni,” tiin.
Chelsea, Manchester United leh Tottenham manager hlui Mourinho leh a club vawn lai Fenerbahce lam chuan an elpui lian Galatasaray puhna leh an thuchhuah siam hi he thu buatsaih lai thleng hian vantlang hriatah an la chhanglet lo.
Two-time Champions League winner Mourinho hi tunah kum 62 mi ni ve tawhin, a kalna apianga chanchin chhia leh tha lam sawi tur nei ve hat reng thin niin, nikum nipui laia Fenerbahce manager ni tura an lakluh hnu khan tun season kal lai tir lamah Turkey rama inkhel viltute chim chin (refereeing standards) a sawisel avangin khelmuala a team vil thei lo tur leh pawisa chawitir pawh a lo ni tawh.
Thawhtanni Turkish top flight Istanbul derby khelh hma pawh khan Turkey ram boruak chu tur ang maia kha niin a lo sawi leh hman tawh a, chuvangin an hmelma lian ber nena an inkhel tur vil tura foreign official chahluh a ni tur lawmawm a tih thu sawiin, match quality siamna atan leh inkhel hlimthla tha zawk hnutchhiah a nih theihna atan pawh hei hi tihmakmawh a ni,” a ti.
– |pa Bunghai
Galatasaray-in racist-ah Mourinho an puh
